Liverpool player thar tur Mane?

Southampton striker Sadio Mane chuan Liverpool a zawm dawn ta a. Nimin khan Mane hian medical test a nei tura ngaih a ni a, he thu i chhiar hi chuan Reds player a ni hman tawh hial maithei. Saints player man zat tur hi sawi chian chiah la ni lo mah se pound maktaduai 30 ai chuan a tlawm lo ang.

Manager Jurgen Klopp-a'n season thar atan tlarhma thuamṭhat a duh a, Mane lakluh nan hian Liverpool-in player man to hlawhtling lem lo Christian Benteke (£32.5m) leh Andy Carroll (£35m) te man bawr vel an thehchhuah a ṭul dawn. Saints hian an player duhlai Senegal international manah hian pound maktaduai 40 hnaih thuak an chhiar nia sawi a awm bawk a, Mane hian Reds a zawm a nih chuan Liverpool player man to zingah a hming chuang ve dawn tihna a ni.

Nikum March 20 khan St Mary Stadium-ah Sou-thampton leh Liverpool an inkhel a, Reds lam hian 2-0 in hma hruai hman mah se Mane goal hnih hmangin Saints hian 3-2 in an lehthal. German boss Klopp chuan an hmelma striker chevel chu a lo hmuhhmaih lo chiang hle.

Liverpool hian tlarhmaah England striker Daniel Stur-ridge leh Belgium rawlthar Divock Origi an nei sa a, season hmasa Premier League match 37 a khelh aṭanga goal 11 khungtu Mane an neih chuan an goal nawr a na sawt tura ngaih a ni.

Hmasawn tum Liverpool hian Mane lakluh nan sum ṭhahnem tak an seng a nih chuan kum 2015-a Aston Villa aṭanga an lak-luh Benteke dinhmun a nghingin a rinawm. Belgium international hian Reds tan match 29 a khelh aṭangin goal kua chiah a la khung.

Southampton hian Liver-pool lakah an player ṭha an chan thei hle a, kum 2014 hnu lamah ringawt pawh Adam Lallana (£25m), Dejan Lovren (£20m), Nathaniel Clyne (£12.5m) leh Rickie Lambert (£4m) te chuan Anfield an lo pan san tawh a. Mak ang reng tak chu Reds-in Saints player ṭha la lutin season liam ta khan pariatnaah an awm a, Southampton erawh paruknaah season tharah Liverpool khelh ve loh tur Europa League an khel ang.

Ronald Koeman-a'n Everton a pan san hnua mana-ger la nei lo Saints hian kum hnih liam taa Salzburg aṭanga pound maktaduai 10 a an lak-luh Mana hi an hralh a nih chuan sum an hlep hnem dawn toh chiang a, mah se a hmunruak luah khat tur zawn a awlsam lo ang. Kumin nipui transfer chhungin Victor Wanyama chu Tottenham Hotspurs hnenah pound maktaduai 10-in an lo hralh tawh bawk.