Russia-in Slutsky banna a pawm

Russian Football Union (RFS) chuan an coach Leonid Slutsky-a'n a hna a bansanna chu an pawm sak.

Kum 45-a upa Slutsky hian nikum August thla khan Fabio Capello hmun-ruak luahin CSKA Moscow manager ni-chungin an ram team enkawl hna a thawk ṭan a, European Championship khel turin a hruai kai.

France-ah Euro 2016 khelh a ni a, beisei angin Russi an cheṭha lo. England nen 1-1 a an inhnehtawk hnuah Slovakia (2-1) leh Wales (3-0) in an hneh lo a, group stage pawh an paltlang zo lo.

RFS president leh sports minister ni bawk Vitaly Mutko chuan, "Russia team enkawl tawhtu zingah chuan Leonid hi a ṭha berte zinga mi a ni a, Euro-a thil thleng chungchang kha chu theihnghilh ila a hna
ṭha takin a thawk tih erawh sawi ka duh," tiin a sawi.

Kum nga chhunga Russian Premier League-a CSKA vawi thum cham-pion pui tawhtu Slutsky hian Russia hi match 13 enkawl hmanin vawi ruk hnehna a chanpui a, an khingpuite nen ṭum hnih inhnehtawkin vawi nga an chak lo thung.