MotoGP Assen-ah beisei loh rider a inlar

Pathianni khan Assen MotoGP tlan a ni a, ruahsur nasa leh kawng nal hnuaia intlansiakah Jack Miller chu pakhatna a ni.

Assen, Netherlands-a intlansiakah hian a tir lamah khua ṭha mah se ruah a sur chhunzawm avangin lap 12 tlan tur a la awm tihah intlansiak chawlh lailawk a ni a - ruah sur hnua intlansiak chhunzawm a nih hnuah pole position aṭanga bul ṭan Andrea Dovizioso bakah Valentino Rossi leh Danilo Petrucci te an chetsual avangin intlansiak an tlan tluan thei lo.

Kum 21-a upa Miller chu rider langsar ṭhenkhat chet fuh loh hmang ṭangkaiin lap riat chauh tlan tur a awm tawh tihah Honda rider Marc Marquez a tlan pel a, MotoGP-a a vawi khat nana pakhatna ni turin a tawp thlengin a chesual tawh lo.

Marc VDS rider Miller-a'n hnehna a chang hi kum 2006 hnua independent team hnehna chang leh thei hmasa ber niin Australian rider zingah kum 2012-a Casey Stoner-a'n Phillip Island a hnehna a chan hnua pakhatna ni leh thei hmasa ber a ni bawk.

Rider championship-a hmahruaitu Marquez chuan a hmahruaina sawh nghet turin pahnihna dinhmun a luah a, point 145 a hmu. Champion lai Yamaha rider Jorge Lorenzo chu 10-naah thlengin point khat a hlawh chhuak hram a, hmahruaitu nen an inthlauhna chu point 24 a ni rih.

Miller chuan mipui a barakhaih thu sawiin, "Intlansiak hma khan miin hnehna ka chan an ring lo a, mahse infiamnaah chuan tih theih loh a awm loh zia ka hmuhtir, ka hlawtlinna avangin ka lawm a, ka awm dan hi thua sawifiah theih a ni lo," tiin a sawi.

Spanish rider Marquez chuan intansiak hautak taka point a hmu thei chu champion tuma inumna kawngah a pawimawh zual bik a rin thu a sawi chhuak ve bawk.

Assen MotoGP result

# Rider Ram Team Time

1 Jack Miller Aus Marc VDS 22 mins 17.447 secs

2 Marc Marquez Spa Honda +1.991

3 Scott Redding GB Pramac +5.906

4 Pol Espargaro Spa Yamaha +9.812

5 Andrea Iannone Ita Ducati +17.835

6 Hector Barbera Spa Avintia +18.692

7 Eugene Laverty Ire Aspar +22.605

8 Stefan Bradl Ger Aprilia +23.603

9 Maverick Vinales Spa Suzuki +26.148

10 Jorge Lorenzo Spa Yamaha +27.604