Euro 2016 German ral a lian

Slovakia-in European Cham-pionship ṭan hmain Ger--many-ah Die Mannschaft an hneh a, 2014 FIFA World Cup champion hian France ramah phuba lain Euro 2016 quarterfinal lut turin Slovenski sokoli (Slovakia football team sawina) chu 3-0 in an sawp.

Stade Pierre Mauroy, Lille-ah Pathianni zan khan Germany-in Jerome Boateng, Mario Gomez leh Julian Draxler te goal hmangin Slovakia an hneh. Arsenal midfielder Mesut Ozil-a'n Die Mannschaft tan penalty hlah mah se inkhel result a danglam phah lo a, Bayern Munich keeper Manuel Neuer-a'n hnai tak aṭanga Slovakia midfielder Juraj Kucka ball tauh a dang hman chu awlsam taka Germany chak theihna chhan pakhat a ni bawk.

An hmu ta!

Euro 2016 ṭantirhah Ger-many-in World Cup champion puitu captain Philipp Lahm hmunruak hnawhkhat zo an hmu lo a, knockout stage thlen meuh chuan Joachim Low-a'n awl zau tak kha ti zim tawhin tlarhma lama goal luh theih nan player a rem fuh ta niin a lang bawk.

Germany boss Low-a'n Ba-yern Munich midfielder Joshua Kimmich chu right back-ah ring chhunzawmin kum 21-a upa hian a hna a tlin leh pek hle. Amaherawhchu Slovakia nena an khelh ṭuma player langsar ber erawh Julian Draxler a ni a, Northern Ireland nen an inkhelh ṭuma Mario Gotze laka khelhna hmun a hloh hnuin Wolfsburg midfielder hi a theihna phochhuah theihna hun pek a ni a, quarterfinal-ah Low-a'n ngaihtuah buai ngai loin a thlang nghal tawh ang.

Die Mannschaft tan goal-keeper Manuel Neuer chu bang rinawm a ni a, Kimmich awm takah chuan Germany tlarhnung pawh a fuh tawhah a ngaih theih. Match hnuhnung pahniha goal hnih khungtu Mario Gomez hi tlarhmaa awm tur tak niin a lang a, midfield-ah Toni Kroos, Sami Khedira leh Mesut Ozil te an mawi a, tunah chuan Germany-in Thomas Muller a chetṭhat hun chiah an nghak tawh niin a lang.

German ral lian

Inkhel an ṭan chauh a, minute riatna lekah yard 25-na aṭangin defender Jerome Boateng-a'n box aṭanga ball per chhuak chu a hlap lut nghal a, goal
ṭha bik a ni. Minute ruk a ral leh chuan Liverpool defender Martin Skrtel chuan ṭul lo takin Gomez a nam a, penalty a chawi. Northern Ireland an khelh ṭuma hmuhnawm ber Ozil a rawn pen chhuak a,
ṭhiante siam thiam tak Arsenal midfielder pet hi Slovakia keeper Matus Kozacik-a'n a kut pahnih a dan sak.

Penalty hlah vangin Ger-many an hnual phah lo a, Slovakia tan phur hluai theihna tur kawng an hawn sak lo. Die Mannschaft hian chance ṭha an hlah nual a, Ozil vanduai zui mah se Germany game mawina a tlahniam lo. Chutihrualin ding lam aṭanga Peter Pekarik-a cross chu Kucka-a'n goal kilah tauh mah se Neuer-a'n beng chhuak hman a, Slovakia an van-nei tawk lo a tih theih rual-in tlarhma leh tlarhnungah Ger-many an ṭha a tih theih bawk.

German player zinga hmuh-nawm ber Draxler-a'n chiang zeta Slovakia midfielder Kucka a bum hnuin Gomez goal khung turin a siam sak. German stri-ker palian hian awlsam taka a khung theih nan amah vengtu lak aṭangin a tharum leh thiamna hmangin hmunawl a insiam chawp a, minute 43-naa a goal khung avangin khelhna hmun a chang zel ang.

First half tawp rualin quarter-final lut tur a chiang tawhah a ngaih theih a, second half-ah Germany-in game pawt muang hret mah se goal khung an ban san lo. Gomez-a siam saktu Draxler-a'n pet goal tute hming ziahnaa a hming nem kai nan minute 63-naah hnai set sawt
aṭangin a volley goal chiang hle.

Joachim Low-a'n quarter-final-ah player pawimawh chan a duh lo a, match hmasa lama yellow card hmu tawh Boateng leh Ozil aiah Benedikt Howedes leh Bastian Schweinsteiger te a luhtir bakah player hmuhnawm Draxler chu hahchawlhna hun a pe bawk. Manchester United midfielder Schweinsteiger hian inelna lian thamah ram tana vawi 36 a inlan ta a, Germany record siam turin goal khung thei bik striker Miroslav Klose (37) chiah a tluk ta lo.

Eng nge an sawi?

Slovakia goalkeeper Matus Kozacik chuan, "Ṭan phat
aṭang-in Germany an chungnung a, harsatna kan siam ve thei lo kha a pawi ka ti hle. Euro 2016 inpuahchahnaa kan hneh avang khan uluk zawkin an inzir pawh a ni thei a, kawng tin rengah keini ai khan an chungnung a ni. Kucka khan goal kha khung se a danglam theih deuh ka ring a, amaherawhchu goal hnihna an khung hnu kha chuan engkim kha a harsa lehzual a ni," tiin Germany an chungnung zawk tih a pha lo.

Slovakia coach Jan Kozak chuan, "German hi chuan tournament an khel thiam a, a hunah tak an tho chhuak ṭhin. German khelh ṭhat ni kan tawng a, theihtawp chhuah mah ila kan hneh loh em a ni. Engpawh chu nise match li kan khelha kan result-ah kan lungawi e," tiin knockout stage an thlen avangin a lawm tih a sawi.

Germany coach Joachim Low chuan, "Inkhel pumpui thlirin khan kan thunun tluan a, kan khelṭha em em a ni. Tuna kan hmachhawn tur erawh team dang daih a ni tawh dawn a, Spain emaw Italy emaw hi team ṭha an nih avangin penalty pet pawh kan zir nasa ang. Quarterfinal atan uluk lehzuala kan inpuahchah a ṭul dawn a ni," tiin an khelhṭhat thu a sawi rualin an hmabak a harsat tur thu a sawi.

Germany hian Inrinni zan dar 12:30 hian nizan lama Spain leh Italy inkhela chak zawk nen quarterfinal an khel ang.