Deschamps-a game plan B a hlawhtling
Euro 2016 thlengtu France-in Antoine Griezmann-a goal hnih hmangin minute hnih leka Robbie Brady hmanga Republic of Ireland hmahruaina chu an lehthal a, Les Blues-in an ram ngeia champion an beiseina chu an chhawm nung zel. Didier Deschamps hote hian nizan lama inkhel England leh Iceland chak zawk nen July 3, Pathianni zan khian quarterfinal an khel ang.
Penalty vangin an buai
Inkhel an ṭan chauh a, Paul Pogba-a'n Ireland forward Shane Long laka penalty a chawi avangin Robbie Brady-a'n minute hnihna lekah goal an khung nghal.
Republic of Ireland-in an khel ṭha chhunzawm a, team ṭha zawka ngaih France-in inkhel an thunun thei lo. Goal mamawh zawk France-in chance ṭha an neih theih loh laiin keeper Hugo Lloris-a'n Ireland goal khung tur ṭum hnih vel zet chu ṭha takin a dang.
First half tawp lamah Les Bleus an insiamrem a, danglamna tluan tling thlengtu erawh Deschamps-a player siksawi a ni.
Griezmann-a Show
Leicester City midfielder N'Golo Kante la chhuakin Bayern Munich winger Kingsley Coman a lutir a, kum 20 leka upa hmangin France-in game rang zawk khelin second half ṭan phat aṭangin Ireland an chhaih buai nghal.
Les Bleus attack na lutuk chu Ireland-in an dawl zo ta lo a, minute 57-naa Bacary Sagna cross chu Antoine Griezmann-a'n an siphurh sut nan a tauh lut a, minute li hnuah Atletico Madrid forward hian chakna goal a khung zui bawk. France goal hnihna luh theih nan hian Olivier Giroud a thawh hlawk a, Arsenal striker hian goal khung lo mah se starting eleven a chan chhan khelmual chhungah an lantir.
Ireland harsatna belhchhah turin defender Shane Duffy chu Griezmann a tihtluk vangin hnawhchhuah a ni a, France tlarhmaten goal an inhlah siak. Giroud thlaktu Andre Pierre Gignac-a'n goal khung theihna hun ṭha a hlah nual a, goal hnih khungtu Griezmann pawhin hattrick a siam thei bik lo. Republic of Ireland lamin hun tawp lamah France tan harsatna siam leh mah se extra time thlen theih nana an mamawh goal an khung thei tawh lo.
Eng nge an sawi?
Republic of Ireland manager Martin O'Neill chuan, "Kan bul ṭan dan thlirin Euro 2016 ka mangṭha ta mai hi kan tuar lo thei lo a ni. France kha minute ruk dang te chu chelh leh thei ilang chuan an talbuai tawh ngei ang a, amaherawhchu kan ṭang khawng thei ta bik lo a ni. Eng pawh chu ni se kan thlen chinah kan lawm a, kan fan-te min ṭawiawmna kha ram tana inchhuanna tham a tling," tiin a sawi.
France coach Didier Des-champs chuan, "Inkhel a harsa dawn tih kan hria a, Ireland-in goal an khung hma avangin a harsa lehzual. Griezmann kha Giroud hnaiha awmtir kan duh avangin player tlan chak Coman kan dah lut a, kan thlak fuh hle a ni. Kan tlarhma lam player-te'n goal khung theihna chance an siam vek kha ka lawm a ni," tiin an khelh dana a lungawi thu a sawi.
France hian quarterfinal-ah midfielder pawimawh N'Golo Kante leh defender Adil Rami te chu hrem vangin an chhawr thei dawn lo a, Ireland laka an game plan pahnihna a hlawhtlin ang bawkin semifinal thleng turin game plan thar nena bul ṭan an mamawh ang.