Barca leh City nen kan inbe lo - Nolito

Manchester City leh Barcelona ten lakluh an duh nia sawi Nolito chuan Premier League club emaw Spanish La Liga champion emaw nen inbiakna an neih loh thu a sawi.

Spain forward Nolito hian season hmasa khan Celta de Vigo tan league-ah goal 12 a khung a, European Championship 2016-ah Turkey 3-0 a an hneh ṭumin goal a khung tawh bawk.

Season tharah chuan City emaw Barca kawr ha tura an sawi Nolito chuan, "Club lian pahnihin min ngaihven a ni tih ka hriatin ka lawm a, ka tan chuan a hlu. Mahse, heng club an sawi te nen hian inbiakna kan nei lem lo," tiin a sawi.

A vawi khat nana ram tana major tournament khel ve kum 29-a upa Nolito hian transfer boruak ai chuan Euro lama a rilru a pek zawk thu a sawi tel bawk.