Andy Murray a chak lo

Beiseina sang tak nen rawn kir mah se Andy Murray chu a thleng sang thei rih lo. World number 1 hlui hi Milos Raonic hneh loin Western and Southern Open last 16 aṭanga vuak tlak a ni. Kum 33 mi Murray hian a match hnuhnung zawkah world number 7 Alexander Zverev a hneh, world number 30 Raonic lakah erawh beisei a phak lo; darkar khat leh minute 29 an inkhelh hnuah 6-2, 6-2 in a chak lo.

Grand Slam vawi thum champion tawh Murray chuan, "Eng lai ber nge ka tlakhniamna leh tih fuh loh lai hriat nghal a har hle, ka inkhel hi TV lamah ka ennawn leh ang, chumi hnuah ka tih sual leh chak tawk lohna lai ka siam ṭha ang," a ti.

Hliam vangin Murray hi tun hnai season thum chhung vel chu a inkhel mumal thei lo, a hliam a dam hnuah singles match pangngai a khel ve thei leh ṭan chauh. August 31 aṭanga khelh tur US Open-ah pawh harsatna a thleng thut a nih loh chuan inlan theih a tum.

Inkhel dangah Novak Djokovic erawhin harsatna a tawk lo thung. Serbian tlangval hian tualchhung player Tennys Sandgren chu 6-2, 6-4 in a hneh a, quarterfinal-ah chuan Jan-Lennard Struff nen an inhmachhawn leh ang.

Kum 33 mi Djokovic hian kuminah match 20 khel tawhin hnehna a chang vek, coronavirus len vangin match erawh an khel tam thei lo. New York khawpuiah hian hliam tenau a tuar a, a match hmasa lamah harsatna nei deuh mah se a dam tawh tih a hriat theih.

Mipui ngaihven zinga mi champion lai Daniil Medvedev-a'n Aljaz Bedene a hneh a, player beisei awm zinga mi Stefanos Tsitsipas pawhin service neih ṭhat vanga mi hriat hlawh John Isner hnehin a tlang ve bawk.