F1 season tawp dan tur tichiang

Formula 1 chuan season hman lai tih tawp dan tur an tichiang. Ruahman sa bakah ram pathum - Turkey, Bahrain leh Abu Dhabi-ah te intlansiak an neih leh hnuhnawh tur thu an tarlang.

Car intlansiakna sang berah hian intlansiak vawi 17 a awm dawn tih a hriat ta a, 2009 hnu lama season khat chhunga inelna an neih tlem ber ṭum a ni ang. Kum tirah khan inelna 21 neih tum ni mah se Covid-19 vangin beisei angin an kal thei lo.

Turkish Grand Prix chu November 15-ah tlan a ni dawn, season kua zet inelna an thlen loh hnuah Istanbul Park chuan intlansiak a thleng ve leh dawn tih a ni. Bahrain chuan November 29 leh December 6-ah inelna a thleng thung ang.

Tun season intlansiak hnuhnung ber chu December 13 hian Abu Dhabi-a awm Yas Marina track-ah tlan a ni dawn. China leh Vietnam rama inelna neih theih hram an beiseina erawh hripui leng vangin a tih luih theih dawn ta lo.

F1 chuan thuchhuah siamin, "Covid-19 vangin buaina chi hrang hrang a thleng, team leh fans lamin an duh khawp inelna an neih ngei kan duh si, harsa tak chungin theihtawp chu kan chhuah," an ti.

Asia bakah United States lamah inelna a awm thei dawn lo. South America bikah phei chuan 1970 hnua a vawi khat nan season an hmang dawn lo tihna a ni.

Kuminah hian intlansiak paruk an nei tawh a, driver champion lai Lewis Hamilton chuan hma a hruai mek. August 30, Pathianni hian pasarihna atan Belgian Grand Prix an tlan ang.