Defensive Player of the Year atan Antetokounmpo

Milwaukee Bucks star forward Giannis Antetokounmpo chu NBA Defensive Player of the Year atan thlan a ni.

Antetokounmpo hian tun hnai season hnih chhung dawng tawh Utah Jazz center Rudy Gobert a khum ta, Gobert hi kuminah pathumna a ni a, award a dawn vawi hnihah hian Antetokounmpo hi pahnihna dinhmun luahtu a ni thung.

Los Angeles Lakers tana season duhawm hmangtu power forward Anthony Davis chu kuminah hian pahnihna a ni. Davis leh Antetokounmpo te hi Most Valubale Player thlanna kawngah pawh inel na thei tura ngaih an ni.

NBA Defensive Player of the Year thlang tur hian March 11 hma lama an chetna kha en a ni, regular season an hman laklawh laiin Covid-19 vangin an chawl lailawk a, a hnuah entu nei loin hmun khatah an khel chhunzawm.

Bucks coach Mike Budenholzer chuan, "Basket venhim kawnga a hnathawh leh inpekna hi thua sawifiah mai theih a ni lo, a theihtawp tak meuh meuh a chhuah ṭhin," a ti. Match tinah rebound 13.7 nei zel anga chawhrual theih a ni a, block leh ball chhuhsak a nei hnem bawk.

Antetokounmpo chuan, "Ka teammate-te chungah lawmthu ka sawi, anni tel lo chuan hetiang dinhmun hi ka thleng thei lo tih ka chiang," tiin a sawi. Mimal chawimawina dawn chu ngai hlu hle mah se team hlawhtlinna a dahsan thu a sawi tel.

Bucks hian playoff-ah Orlando Magic an hmachhawn a, series-ah 3-1 in hma an hruai mek. Nizan khan game 5 an khel a, he thu buatsaih lai hian result kan hre hman lo, an chak a nih chuan semifinal an lut tlang nghal ang.

Nimin zing NBA playoff inkhel dangah Los Angeles Clippers leh Denver Nuggets ten hnehna an chang ve ve bawk. Miami Heat, Boston Celtics leh Toronto Raptors te chuan conference semifinal hi an lut chiang tawh.