Messi-a'n Barca chhuahsan a dil!

Football ropuina leh mawina sawi nan, "Football-ah thleng thei lo a awm lo," tiin an sawi ṭhin a, he thu dikna hi khelmualah chauh ni loin a pawn lam thlengin kan hmu zel dawn niin a lang. 

'Mr. Barcelona' tih hiala hminglem an pek Lionel Messi chuan Thawhlehni zan khan Barcelona thuneitute hnenah chhuah dilna lehkha a thawn a, Barca chhuahsan duh anga an sawi chu thuthang mai a nih loh thu a nemnghet.

Ni e, i chhiar dik ngei e - Messi-a'n Barcelona chhuahsan a dil a, football khawvel a nghawr nghing nghal. Thawhlehni zan khan social media chu Messi chungchang sawinain a luah khat nghal a, football ngainatu mai ni lo thlengin an ngaihven. 

Mi tam takin khawvela footballer piang tawh zinga thiam ber ang hiala an chhal dilna avangin Barca thuneitute chu Thawhlehni zan khan hmanhmawh takin an ṭhukhawm a, he thu buatsaih thleng hian an thutlukna hriat a la ni lo. 

Rilrua zawhna lo piang hmasa ber chu, "Engvanging nge Messi-a'n chhuah a duh?" tih a ni a, a chhanna awlsam ber chu Argentine forward hi club thuneitute chungah a lawm lo. Spanish La Liga nomawi an hloh ṭum khan Messi hian ualau takin a lungawi lohna a sawi chhuak tawh a, fan-te pawhin anmahni vangin an dawhtheihna an hloh zo tawh niin a sawi. 

Champions League aṭangin Barcelona an tla zui a, an tla satliah a ni mai lo. Catalan club hian Bayern Munich chu 8-2 ngawtin an ngam lo a, Barcelona tan mualphona a ni mai lo a, Messi tan pawh mualphona a ni. Messi-a'n chawlh a la zui a, a lam hnai tak tak tan lo chuan biak pawh theih loh turin a awm zui. Argentine forward hian a beisei ang result an neih loh chuan a 'nu' tak ngial pawh a be duh ngai lo a, midang pawh phak loha nun hman chu a nuam tih ber a ni. 

Mi tam takin Messi chungchanga an sawi ṭhin chu, " Barcelona-ah thuneitu ber a ni," tih hi a ni a, mahse an sawi ang em em chuan Messi hi Catalan club-ah hian a thu lo niin a lang. 

Tun hnaiah Messi hian club board lamah a duhna a thlen fo - Ronaldinho hnua khelhpui nuam a tih ber Neymar nena khelh dun leh a duh a, laklet tum turin club board a ngen a, an la let thei lo. Ernesto Valverde ban a nih dawn khan Messi chuan Athletic Bilbao boss hlui hi chhanin a hna ngai chelh chhunzawm tir ṭha a ti a, mahse Messi duh dan ang lo takin an ban. Valverde ban a nih hma khan La Liga-ah hma an hruai a, Champions League last 16 an lut bawk. 

Season hmasa ṭan dawna Antoine Griezmann an lei dawn khan Messi-a'n Atletico Madrid thiampuipa leichhuah hi a ṭulna a hre lo a, an mamawh niah a ngai lo. Mahse, Barca-in an lei ta tho a, French forward hian season hman zawh takah khan match 48 khelin goal 15 chiah a khung. 

Champions League-ah AS Roma, Liverpool leh Bayern Munich lakah Barcelona an mualpho a, Messi-a'n club thuneitute hnena a ngaihdan leh duhdan a sawi te a tlang thei chuang lo. Bayern laka an mualpho meuh chuan Messi a insum zo ta lo. Chawlh hmanga a awm bo hlanin Barca-in coach thar Ronald Koeman an lalut a, Dutch coach hian Messi chu Barca din tharna tura a tana player pawimawh a nih tur thu a sawi.

Barca president Josep Maria Bartomeu pawhin Messi-a pa nen inbiakna an neih thu a sawi a, a sawi tel loh erawh Messi pa hian a fapa a titi pui phawt tur thu a lo hrilh kha a ni. Messi pa hian a fapa rilru a hria a, a thu hmu loin Bartomeu hi ṭawngkam ṭhaa lo thlah a ngam lo. A chawlh hmanna aṭangin Messi a lo haw a, Koeman chu a titi pui nghal. Dutch coach hnenah hian Barca chhuahsan a hnaih thu a hrilh a, hei hi Catalan radio station RAC 1 chuan an puang - he station hi ualau taka Bartomeu thlawptu an ni a, hei hian Messi a ti lawm lo lehzual. 

Messi-a'n ngai pawimawh tak chungin Koeman-a titi pui a, mahse an inbiakna chu a lo put ru leh si. Spanish football expert Guillem Balague chuan, "He thil hi chu a chung lam aṭanga put ru a ni. A nihna takah chuan Messi hi misual anga lantir a, fan-te huat tir an tum a ni," a ti!

Barca thuneitute hian Messi chhuahtir hi an pawi ti lo niin a lang a, mahse khawvela footballer ṭha ber chhuahtir hi an tan mualphona a nih avangin Argentine forward zawk hi 'thiam lo' anga lantir a, chhuahtir an tum. Covid-19 vangin Barcelona hi an sum lakluh a tlem phah a, player hlawhah an sum lakluh 70% lai an sen bawk si avangin player hlawh hnem ho um bo an tum a ni berin a lang - Messi hian chhiah tel miah loin kum khatah euro maktaduai 50 vel a hlawh!

Messi-a chhuah chuan Barca hian he sum hi an squad din thar nan hman an tum. Mahse, fan-te huat tir an tum kha fan-ten pathian ang hialin an lo la en si a, board zawk lu haiin an talbuai mek - a la ngaihnawm dawn chauh. 

Lionel Messi-a'n Barce-lona chhuahsan a tum thu sawi a nih ruala Barca-in an phawrh ran ber chu a contract a ni a, Messi hian kum 2021 nipui thleng contract neiin a lei chhuak duh tan euro maktaduai 700-a lei theih a nih thu a inziak tel. 

Covid-19 vanga sum buaina nena ngaihtuahin euro maktaduai 700-a Messi lei hi eng club tan mah thil theih niin a lang lo a, a hlawh ngaihtuah tel phei chuan ngaihtuahna sen buai loh law law chu thil finthlak niin a lang. Mahse, Barca-in Messi contract-a inziak tel, an tarlan loh, Messi-a'n a rawn phochhuah a awm a, chu chu season tawp apiangin Messi hian a thlawnin a duhna lam pan theihna dan a nei!

Kum 33 mi forward hian hei hi ṭan chhanah a rawn nei chat a, Barca lam hian 'season tawp' tih bakah 'June 10' thleng tih a inziah tel avangin hei hi ṭan chhanah an nei theiah an inngai thung. Messi-te lam hian Covid-19 vanga season pawhsei a nih avangin June 10 tia contract-a an ziah lan hian awmzia a nei loah an ngai a, a free-a chhuak turin thuneihna neiah an inngai. 

Hriat tel tur chu Messi hi inngaihtuah lungpuam thuta che a ni lo - a chhungte a titi pui phawt a, a hnuah a ukil be rawn lehin rilru fim tak nen chhuah dilna lehkha hi an thawn. Hetihlai hian Barcelona hian a thlawn tawpa Messi chhuah an phal dawn lo chiang a, anni hian an dan hremi be rawnin hnehna chan theih an inbeisei ve tho - an player ropui ber nen Barcelona an indo dawn tihna a ni a, boruak a namai lo tawp ang. 

Messi Record

*    La Liga-a goal khung hnem ber (444 goals)

*    Ballons d'Or leh FIFA World Player of the Year/Best FIFA Men's Player Awards (6) chawimawina dawng ngun ber. 

*    Kum 2012 khan club tan goal 79-a khung a, ram tan goal 12 khung bawkin kum khat chhunga (season ni lo) goal khung hnem ber record a ni - match 69-ah goal 91-a khung! 

*    Season 10 chhung a zawna season tin goal 40 khung ziah thei awmchhun a ni. 

*    Champions League-ah goal 115-a khung tawh a, club pakhat tana CL-a goal khung hnem ber record a ni. 

Barcelona-a nomawi chawi tawh

La Liga: 2004–05, 2005–06, 2008–09, 2009–10, 2010–11, 2012–13, 2014–15, 2015–16, 2017–18, 2018–19

Copa del Rey: 2008–09, 2011–12, 2014–15, 2015–16, 2016–17, 2017–18

Supercopa de España: 2006, 2009, 2010, 2011, 2013, 2016, 2018

UEFA Champions League: 2005–06, 2008–09, 2010–11, 2014–15

UEFA Super Cup: 2009, 2011, 2015

FIFA Club World Cup: 2009, 2011, 2015

Mimal Chawimawina Langsar

Ballon d'Or/FIFA Ballon d'Or: 2009, 2010, 2011, 2012, 2015, 2019

FIFA World Cup Golden Ball: 2014

FIFA World Player of the Year: 2009

The Best FIFA Men's Player: 2019

European Golden Shoe: 2009–10, 2011–12, 2012–13, 2016–17, 2017–18, 2018–19

Copa América Golden Ball: 2015

UEFA Men's Player of the Year Award: 2011, 2015

UEFA Club Footballer of the Year: 2009

La Liga Best Player: 2008–09, 2009–10, 2010–11, 2011–12, 2012–13, 2014–15

Pichichi Trophy: 2009–10, 2011–12, 2012–13, 2016–17, 2017–18, 2018–19, 2019–20

FIFA Club World Cup Golden Ball: 2009, 2011

IFFHS World's Best Playmaker: 2015, 2016, 2017, 2019

Olimpia de Plata (Argentine Footballer of the Year): 2005, 2007, 2008, 2009, 2010, 2011, 2012, 2013, 2015, 2016, 2017

FIFPro Young World Player of the Year: 2006, 2007, 2008

Golden Boy (Young European Footballer of the Year): 2005

FIFA FIFPro World11: 2007, 2008, 2009, 2010, 2011, 2012, 2013, 2014, 2015, 2016, 2017, 2018, 2019

UEFA Team of the Year: 2008, 2009, 2010, 2011, 2012, 2014, 2015, 2016, 2017, 2018, 2019

UEFA Ultimate Team of the Year

La Liga Team of the Season: 2014–15, 2015–16

FIFA World Cup Dream Team: 2014

Copa América Dream Team: 2007, 2011, 2015, 2016

Laureus World Sportsman of the Year: 2020

World Soccer Greatest XI of All Time: (published 2013)