Khawiah nge Messi-a kal dawn?

Lionel Messi chhuah duh thuin khawvel a deng chhuak a, Argentine forward kalna tur hmun hi an inrinsiak nghal - tun dinhmunah chuan Manchester City chu hming ri ring ber an ni. Paris St-Germain leh Inter Milan hming pawh sawi rik a ni a, Manchester United, Chelsea, Liverpool leh Arsenal pawh sawi rik zingah an bang lo.

Messi-a'n coach a hrawn tawha a dan san ber chu Pep Guardiola a ni a, Spanish manager hi phone hmangin City zawm a duh thu a hrilh niin khawthlang media-te chuan an tarlang leh der tawh!

Kum 2016 khan City hian Messi hi an lo hnimhnai tawh a, Pep bakah a coaching staff Ferran Soriano leh Txiki Begiristain-te hi a ngainat sa bawk avangin Manchester khaw lam pana a puanthuah a tel thut a nih pawhin a mak lo ang. 

Spanish television channel lar Cuatro chuan United-in Messi lakluh an tum dawn thu an sawi a, nuih liam chi a ni lo. March thla khan American football team Tampa Bay Buccaneers chuan quarterback ropui Tom Brady an lalut a, he team neitu hi United neitu Glazer chhungkua an ni. 

Glazer hian an duhnaah chuan sum an ren lo tih a chiang. Chelsea-in nipui transfer-ah sum an seng nual tawh a, Messi an lakluh theih dawn phawt chuan insen an hreh lo ang. Arsenal leh Liverpool hming a ri tel a, hei erawh beisei san a harsa. 

City ang bawka sum ngah Paris St-Germain-in Messi ṭhianṭha Neymar an kawl a, Suarez beiseitu ni bawka sawi team hian Messi lakluh an duh - 'MSN' kan hmu leh lo ang tih tu nge sawi thei?

Inter Milan-in boss Antonio Conte an chelh dawn a, sum hman tur an pe dawn. Serie A-a Juventus rorelna tihtawp duhtu club hi sum lama buaina nei lo Chinese company Suning Holdings ta an ni a, club president Steven Zhang chuan Messi aiawhte a be tawh nia sawi a ni. 

Messi hian an khaw club Newell's Old Boys-a inkhelh chawlhsan a duh thu a lo sawi tawh ṭhin a, hei erawh a career tawp a la hlat avangin a thlen lawk a rinawm loh. Asia lam pawh sawi rik a ni a, sum tam mah se Messi hi chuan top level-a khelh a la thlahlel rih. 

Hetihrual hian Messi hi a chhuak ngei ngei dawn tihna a ni lo a, club president Josep Maria Bartomeu hian banna a theh lut 'thut' a nih chuan club thuneitute chunga lungawi lo Messi hian a ngaihdan a thlak ve daih thei.