Chhantu nei ṭha Messi

Messi-a'n chhuah a dil thu media-a a darh hnuah Barcelona tana a khelhpui ṭhin a ṭhiante an lo lang a, Barcelona chanchina player ropui ber hian chhantu a tlachham lo hle. Barca captain awm tawh zinga ropui ber pawl, player-te zah rawn Carles Puyol chuan, "Zahna leh duhsakna nen, Leo. Ka ṭhian, ka thlawp tlat zel ang che," a ti a, Puyol-a'n Messi lam a ṭang. 

Koeman-a'n phone hmanga a mamawh loh thu a hrilh Luis Suarez chuan twitter lama Puyol-a thuziak hi a thlawp tih lantir nan a lo chhang a, kut beng lai lem a dah. Barcelona khawpui innghahna Catalonia president Quim Torra chuan Messi a thlah fel der a, "Catalonia hi i in a ni reng dawn a, hun hlimawm leh football ropui tak min hmuhtir avangin lawmthu kan hrilh che. 

"Khawvela footballer ṭha ber leh infiammi ropui tak chu hun rei tak chhung kan nun kan hmanpui thei che a, kan vannei takzet a ni. Kan theihnghilh ngai lo ang che," a ti. Hetihlai hian Barce-lona chhuahsan tur zinga mi Arturo Vidal chuan, "Sakeibaknei in hual bet a nih chuan a tlawm lo ang, theihtawp chhuahin a bei let ang," tiin a sawi a, Messi chungchang a sawina a ni. 

Thawhlehni zan khan Barca fan-te chu Nou Camp-ah an pungkhawm bawk a, Messi-a'n ṭantu a baihvai lohzia thlirin Barca thuneitute lu a hai khawp ang! Hetihlai hian Bayern Munich lama a loan hun hmang zo Philippe Coutinho chuan Barce-lona-a kir ai chuan Premier League lama kir leh a duh zawk nia sawi a ni bawk a, Manchester United, Chelsea leh Arsenal-te chuan Brazilian midfielder hi an thlithlai mek.