Champion lai ngamtu Italy

Italy-in Giorgio Chiellini leh Graziano Pelle te goal hmangin Spain 2-0 in an hneh a, Italian boss Antonio Conte hote hian a zawna European Championship-a no-mawi chawi thei awmchhun La Roja lakah kawng tinrenga chungnung zawk ni chungin quarterfinal an lut. Azzurri-in Euro champion lai an hneh a, world champion Germany lakah fiahin an awm chhunzawm ang.

Stade de France, Saint Denis-ah ruah sur nasat vangin Spain-in an duh angin ball an inpe kual ṭha thei lo a ni thei a, amaherawhchu Thawhṭanni zan inkhela Vicente del Bosque hote tana harsatna siamtu tak erawh Chelsea boss ni mai tur Conte 'game plan' a ni a, inelna lianah Italian defender-te an vul a ni ber.

Candreva tel loin

Spain boss Vicente del Bosque-a'n France rama zin turin Chelsea forward Diego Costa leh Atletico Madrid forward Fernando Torres te a hnawl a, Euro 2016-ah player 11 rin bik a nei tih a lang bawk. Kum 65-a upa Spanish manager hian group stage-ah starting eleven ngai vek a hmang a, Italy hmachhawntur pawhin a mi rin 11 te bawk an lut.

Italy boss Antonio Conte erawhin Juventus midfielder Claudio Marchisio leh PSG midfielder Marco Verratti te inhliam vangin a ko thei lo a, group stage-a player pawimawh Lazio winger Antonio Candreva pawh inhliam vangin hman theih a ni lo bawk. Amaherawhchu kum 46-a upa Italian manager hian khelh dan phung nghet a nei a, chhawr theih player-te thiam takin a rem.

De Gea a rim

Italy-in defensive game khel chungin an goal nawr a na nghal a, minute 8-na leka Alessandro Florenzi freekick Southampton striker Pelle ball tauh chu Manchester United keeper David de Gea-a'n a dang ṭha nghal hle. Minute thum hnuah Florenzi freekick chu Emanuele Giaccherini-a'n nalh takin a bicyle kick a, De Gea-a'n ṭha takin lo dang lo ta pawh ni se referee berin a ham hman.

Spain an him hram hram a, vei lam aṭangin Mattia De Sciglio hmangin an nawr tel a, striker palian Pelle-a'n ball kang a lak theih bawk avangin La Roja an talbuai zel. Minute 33-naa Eder-a freekick kawh zet chu De Gea-a'n hmun hima a nam chhuah hmain Giaccherini-a'n khawih per hmain Chiellini-a'n a su goal.

Italy goal nawr a na zel a, Gianccherini-a ball pet ṭha zet chu De Gea bawkin a dang. Spain-in keeper ṭha nei lo se chuan Italy hian first half-ah goal tam zawk an khung ngei ang.

Forza Italia

Spain-in goal hmaa hlauhawm loh Nolitio aiah lu hmang thiam Aritz Aduriz an luhtir a, La Roja lamin first half aiin ball an chang tam tawh zawk.

Champion laiin an siphurh sut tumin nawr bawk mah se Cesc Fabregas, Aduritz leh Pique te ball pet chu Italy keeper Gianluigi Buffon-a'n harsatna nei loin a dan sak. Real Madrid rawlthar duhawm Lucas Vazquez-a'n chance ṭha nei mah se Italian tlarhnung offside trap-ah a tang hman chiah chiah a, captain Ramos lahin corner aṭanga a chance neih chu goal zawnah a tauh thei lo.

Italy-in goal venhim hna an thawk a, an goal nawr a la na zawk cheu. Italian zinga Brazilian Eder chu Italy tan mawina a ni a, Inter Milan-a loan hmanga khel mek striker hian Pelle nen Spain tlarhnung an
ṭhiah hnuah De Gea chiah a paltlang thei lo. Injury time-ah Florenzi aia lut Manchester United winger Matteo Darmian cross chu Pelle-a'n chiang zetin a volley lut a, De Gea dem theih a ni lo. Tlarhnung rem phui thiam Italy 2-0 in an chak a, an vanneih ṭum chu ni se hei aia tam hi an khung thei tur an ni.

Conte a ropui

1994 UEFA Champions final-ah Johan Cruyff kaihhruai Barcelona leh Fabio Capello enkawl AC Milan an intawng a, game mawi khel Catalan club hi chak tur zawka rinkai ni mah se Italian game nghet ṭha zet lakah an thamral. Milan hian Olympic Stadium, Athens-ah 4-0 in Barcelona an sawp.

Kum 22 a ral meuh chuan Italian football-in an hniam lai ber an tawng chho mek niin an sawi a, Spain erawh an ropui lai a ni. Amaherawhchu Italian game a chul lo a, champion lai hmaah Conte hote an mawi. Spain-in goal ven an ngaihthah a, goal nawr an tum laiin an khingpui zawkin an nawr ve tho si a, an talbuai tih zep rual a ni lo.

First half chhung zawngin De Sciglio leh Florenzi te'n Spanish keeper De Gea-a'n wing back pahnih Juanfran leh Jordi Alba te ball a pe tur chu an tibuai hman zel a, United keeper hian awmze neiin ball a pet chhuak thei lo. Spain midfield khaipa Sergio Busquets lah Saints forward Pelle-a'n ball sem lo turin a veng ṭha a, Andres Iniesta pawh player pahnih talin an hnaih hman zel. Italy-in an defending ti chak turin an attack tel a, Chiellini leh Bonucci te'n Spain player ball an chhuhsak apianga chak taka ball an khalh chhuak chu an tumtih a chiang a, nghawng lian tak a nei bawk.

Second half-ah Italy-in attack ngaihthah hret mah se tlarhnung lamah erawh a phui ṭha hle. Spain-in harsatna an siam lo tih a lan chianna chu an yellow card hmuh danah a ni. Italy tlarhnunga player pawimawh Chiellini, Andrea Barzagli leh Bonucci bakah midfielder ṭangkai Daniele de Rossi ten group stage-ah yellow card an hmu vek tawh a, Spain laka an hmuh leh chuan Germany hmachhawn lo thei an ni. Amaherawhchu Juventus defender pathum leh Roma midfielder te hian Spain lakah yellow card an hmu lo a, hmu tur ang pawhin an khawsa lo - La Roja hian Azzurri defender-te tan buaina an siam lo!

Del Bosque-a'n a pawm thlap

Spain coach Vicente del Bosque chuan, "Game ropui tak chu an khel lo a, mah se chak phu zawk chu an ni. An chak ṭha a, boruakah kan tluk lo a, an goal nawr a hlauawm bawk. Second half ṭan khan thawhlehna chance kan nei a, theihtawp chhuah mah ila goal kan khung thei lo," tiin an chak loh a pawm.

2014 FIFA World Cup-ah Spain-in group stage an paltlang lo a, tunah last 16-ah bak an thleng zo lo. Del Bosque chuan, "Spanish football hian kalphung nghet tak a nei a, player ṭha tak tak an awm bawk avangin tun hi kan tawpna tur a ni lo. World Cup qualifier-ah Italy hi kan la hmachhawn leh dawn a, ka hmalam hun erawh president (Spanish Football Federation) nen kan inbiak hnuah a chiang ang," tiin Spain football chu tla chhe mai tur a la nih loh thu a sawi.

Italy coach Antonio Conte chuan, "Italy national enkawl ṭantirha ka sawi ang khan hlawhtlin kan duh a nih chuan club ang chiaha kar tina khel ho ṭhina kan khelh a ngai. Thla khat chhuang chu team dang kan barakhaih theih nan kan rilru leh taksa kan buatsaih a, kan khelh dan hmang kan duang a, heng zawng zawng hlawhtlinna chhan hi player-te vang a ni," tiin a sawi.

Inrinni zan hian Italy-in quarterfinal-ah Germany an hmachhawn dawn a, De Rossi inhliam vanga thlaktu Thiago Motta-a'n Spain nen an inhmachhawn ṭum hian yellow card vawi hnihna a hmuh avangin a khel ve thei lo ang.