Wimbledon Djokovic leh Federer an chak nghal

Khawvela tennis tournament upa ber Wimbledon chu Thawhṭanni tlai khan khelh ṭan a ni a, mipa single-ah Novak Djokovic leh Roger Federer ten hnehna an chang nghal. Hmeichhe lamah seeded 23-na Ivanovic erawh a chak lo nghal thung. Inkhel hi Star Sports 1 leh Star Sports 4-ah live a ni.

Centre Court-a inkhelah world number 1 Djokovic chuan khawtual tlangval James Ward chu darkar hnih leh minute thum chhungin 6-0, 7-6, 6-4 in a hneh.

Champion lai Djokovic hian inkhel bul a ṭan fuh tak zet a, game hmasa 10 zet chu a la fai vek. Mahse, set hnihnaah Ward hian thapui rawn thawh letin Serbian tlangval hi a chhaih buai ve hman hle - a tawpah erawh Djokovic-a'n a thiam leh theihna bakah a tawnhriat ngah tawh tak a chhawr ṭangkai.

Grand Slam pali kawl khawm mektu Djokovic chuan, "James khan service ṭha tak a nei a, chhuhsak a awlsam lo. A bul ka ṭan fuh em avangin thil dang kha chu a awlsam chho duak tawh a, ka ngaihdan chuan ka khelh ṭha thawkhat hle a, bul ṭanna ṭha tak a ni," tiin a sawi.

ATP ranking-a kar 205 chhung pakhatna dinhmun luah tawhtu Djokovic hian ace vawi 12 vaw chhuak chunga Kyle Edmund hnehtu Adrian Mannarino a hmachhawn leh ang.

Wimbledon vawi sarih cham-pion tawh Federer-a'n a lo ropui tawh ṭhinna hmunah player tawhkhirh a nih zia a lantir leh ta. Swiss thiampuipa hian darkar hnih leh minute nga chhungin world number 52 Guido Pella chu 7-6, 7-6, 6-3 in a hneh a - kum 2012 hnu lama a Grand Slam title hmasa ber tur a la beisei ve zel.

Hnungzâng na vanga French Open khel thei lo Federer chuan, "Kuminah hliam vangin ka buai fo a, Wimbledon khelh theih loh ka hlauh em avangin February thla aṭang khan ka inbuatsaih nasa hle. Harsatna lian tham awm loa ka inkhel thei hi ka lawm takzet," tiin a sawi chhuak.

Grand Slam vawi 17 cham-pion tawh Federer hian second round-ah chuan world number 54 Ricardas Berankis hnehtu Marcus Willis a bi tum leh dawn a ni.

Mipa inkhel dang

Coach thar John McEnroe kaihhruaina hnuaiah seeded parukna Milos Raonic chuan 7-6, 6-2, 6-4 in Pablo Carreno Busta a hneh. Wimbledon vawi thum champion tawh McEnroe hian tun tournament chhung atan Raonic hi a kaihruai dawn a ni.

Inkhel dangah seeded pangna Kei Nishikori chu inkhelh laiin a hnung na vangin enkawl ngai mah se service nei ṭha tak Sam Groth chu 6-4, 6-3, 7-5 in a hneh. Japan tlangval hian first round paltlang turin darkar hnih leh minute 10 hun a mamawh.

Mipa player langsar dang David Ferrer, David Goffin, Marin Cilic Gilles Simon leh Sam Querrey te pawhin an khingpui ṭheuh hnehin second round an lut ve bawk.

Hmeichhe inelna

French Open champion Garbine Muguruza hi hmeichhe single champion tura rikai a ni. 2015 Wimbledon runner up hian set hmasa ber awlsam takin la mah se break point vawi 19 a hmuh aṭanga vawi li chauh a hman ṭangkai theih avangin set hnihna a hloh mah se 6-2, 5-7, 6-4 in hnehna a chang zui ta tho a ni.

Wimbledon vawi nga champion tawh Venus Williams chuan Grand Slam-a a match 71-na khelin Donna Vekic-i'n set point vawi hnih a hmuh tawh chu a pawtthla leh a, 7-6, 6-4 in hnehna a chang. Second round-ah American Venus hian world number 115 Maria Sakkari a hmachhawn zui leh ang.

Ana-i tan a na

Kum 2008-a French Open nomawi a chawi khan Ana Ivanovic hi khawvela hmeichhe tennis player langsar ber ni chho thei tur hial a ngaih a ni.

Mahse, world number 1 hlui hian beisei a phak lo chho zel a, kumin Wimbledon-ah pawh hian seeded 23-na chu chang phak ve mah se a vawi khat nana Grand Slam khel ve chauh Ekaterina Alexandrova chu 6-2, 7-5 in a hneh lo nghal.

2007 Wimbledon semi-finalist Ivanovic chuan, "Ka ban rek na a la dam chiang lo deuh tih a hriat a, ka ball vuak ṭhenkhatah harsatna min siam," tiin a chak loh chan chu a hliam vang a nih thu a sawi.

Serbian nula chuan chawlh a tum thu sawi chunzawmin, "Rio Olympic-ah dam taka ka inkhelh theih nan tunah chuan chawlh hahdam ka duh a, ka hliam hi MRI kan ti ang. Chumi result a zir chuan ka inkhelh
ṭan leh theih hun tur chu a hriat theih ang," tiin a sawi bawk.