Sevilla coach thar Jorge Sampaoli

Europa League champion Sevilla chuan Jorge Sampaoli chu an coach thar atana an la lut. Chile coach hlui hian La Liga club tan hian kum hnih daih contract a ziak phawt.

May thla khan Sevilla chuan Liverpool hnehin Europa League champion nomawi an chawi a, tun hnai kum 10 chhunga an vawi nga champion-na a ni nghe nghe.

Manager Unai Emery-a'n season thum chhung Europa League nomawi a chawi zawn pui hnuah club a chhuahsan tur thu a sawi tawh avangin Sevilla hian amah thlahtu tur an zawng reng a, a chhanna chu Argentina pachal Sampaoli hi a ni.

Kum 56-a upa Sampaoli hian nikum khan Chile chu Copa America-ah a cham-pion pui a, final-a an hneh hi Argentina an ni nghe nghe. Kumin January thla khan a hna hi a bansanin tunah chuan Ramon Sanchez Pizjuan Stadium lamah a inbengbel chho dawn a ni.

Sevilla chuan an manager thar chungchangah thuchhuah siamin, "Jorge Sampaoli chuan season hnih lo awm leh tura Sevilla enkawl turin contract a ziak. Argentine coach hian South America-ah chauh ni loin tunah chuan a vawi khat nan Europe-ah hna a thawk tawh dawn," an ti.

Sevilla president Jose Castro chuan an manager thar chu khawvela a ṭha berte zinga mi a nih thu leh inkhelh zawng zawnga hnehna chan duh mi a nih avangin a dah san thu a lo sawi ve bawk.