Blanc-a'n PSG chhuahsan chiang ta

Laurent Blanc chuan kum thum chhung a lo enkawl tawh Paris St-Germain coach hna chu a kal san fel ta. Sevilla boss hlui Umai Emery chuan Paris a pan thuai rin a ni.

Kum 50-a upa Blanc hian 2013 season khan PSG enkawl hna hi a thawk ṭan a, Paris-ah kum thum hun a hman chhung-in French Ligue 1-ah a champion kim vek bakah a season hnuhnung pahnihah phei chuan treble champion an ni hial.

Mahse, French manager hian a club chu Europe lamah beisei ang a thlen pui thei lo. Season thum chhungin Champions League quarterefinal lut ve mah se an paltlang zo lo vek a - season liam ta khan Manchester City an hneh lo.

Club president Nasser Al-Khelaifi-a'n Champions League nomawi a duh a, chumi chawi thei tur chuan player lei nan leh an hlawhah pawh sum a seng hnem. Tun thlatir khan Al-Khelaifi hian, "Tun season chu kan hlawhchham," ti hialin a lo sawi tawh a, hei hi manager 'kei ka ni' inti tan chuan pai daih theih chi a ni lo tawp ang.

Kumin February thla khan Blanc hian PSG-ah 2017-18 season thleng cham chhunzawm turin contract thar a lo ziak thar. French media-te chuan PSG hian zâng na dawm nan euro maktaduai 22 an pe niin an tarlang.

PSG CEO Nasser Al-Khe-laifi chuan, "Laurent Blanc kaih-hruaina hnuaiah he club hian khelh dan phung thar neiin hma a sawn a, result
ṭha pawh a nei. Kum thum chhunga a hnathawh zawng zawngte a vang khan a chungah lawmthu kan sawi a, chona thar a hmachhawn lehna turah duhsakna ka hlan e," tiin a sawi.

Player a nih laia Barcelona, Inter Milan leh Manchester United kawr lo ha tawh Blanc hian an ram team pawh a lo enkawl tawh a, Euro 2012 khan quarterfinal hruai thlengin Spain an hneh loh hnuah a hna a chawlhsan.

PSG tana nomawi 11 chawia an club chanchina champion pui hnem bertu manager Blanc chuan, "PSG nena kan inzawmna chu a tawp ta. Paris-a hna ka thawhpui zawng zawngte chungah ka lawm a, PSG leh a fan-te hi hun duhawm an hman chhunzawm ka duhin hlawhtlina chang zel turin duhsakna ka hlan," tiin a club hlui chu a mangṭha.

Blanc-a thlaktu tura an sawi Emery hian Spanish La Liga club Sevilla chu season thum chhung a zawnin Europa League-ah a champion pui tawh a, 2008-2012 season chhung khan Valencia chu league-ah pathumna dinhmun vawi thum a lo luah pui tawh bawk. PSG enkawl hna hi a thawk a nih chuan French champion hian Europe-a rorel an duh avangin hna awlsam a ni dawn lo.