Olympic beisei sangtu Saina

World number 1 hlui Saina Nehwal chuan August thla a neih tur Rio Olympic atan a inpeih thu leh beiseina a neih san thu a sawi chhuak.

Indian shuttler Saina hi kuminah a khel ṭha tawk lo a, hliam a neih fo bawk avangin world ranking-ah pawh paruknaah a tla hniam tawh. Mahse, a tournament khelh hnuhnung ber Australian Super Series-ah erawh rawn khel ṭha chhuak ve lehin a champion - tun thlatir khan kumina a title hmasa ber a la chauh.

2012 London Olym-pic bronze medalist Saina chuan, "Ka naupan lai aṭanga badminton khel thiam bik tia sawi tur ka ni ngai lo a, mah se ka thawhrim em vanga hetiang dinhmun thleng thei hi ka ni. World class player nena inhmachhawn tur chuan hmasawnna tur ka la ngah a, Rio atan hian nasa takin ka inbuatsaih a, London ai khan thlen san theih ngei ka inbeisei," a ti.

Kum 26-a upa Saina hian a taksa hriselna vawng ṭha tura inenkawl uluk a ngaih thu a sawi bakah Olympic hmasa ai chuan kumin hi inelna a hautak zawka a rin thu a sawi tel bawk.