Mualpho takin England an tla

England-in European Championship 2016-ah an ram mipui beisei an phak lo tluan a, last 16 lut pha zinga team awlsam bera tura ngaih Iceland chu 2-1 in an hneh lo.

Nice-ah minute lina leka Iceland keeper Hannes Hall-dorsson laka Raheem Sterling-a penalty hlawhchhuah chu captain Wayne Rooney-a'n chiang zetin a khung a, bul ṭan ṭha England lawm chhung a rei lo. Throw-in hmang ṭangkaiin minute ruknaah Iceland-in defender Ragnar Sigurdsson hmangin an sut a, minute 18-naah FC Nantes forward Kolbeinn Sigthorsson-a'n chakna goal a khung.

Hodgson-a duhdan?

England manager Roy Hodgson-a'n group match hnuhnung bera Slovakia an hmachhawn ṭumin player a enchhin ṭeuh a, amaherawhchu kum 68-a upa English manager hian rin laklawh a nei tho.

Iceland hmachhawn turin Euro 2016 hmaa inhliam vanga friendly match pawh khel thei lo a, Liverpool forward Daniel Sturridge-a'n inkhel bul a ṭan a. France rama beisei pha lo Harry Kane leh Raheem Sterling te a ring chhunzawm zel a, Slovakia nen an inkhelh ṭuma player hmuhnawm Liverpool duo Jordan Henderson leh Nathaniel Clyne aiah Spurs duo Dele Alli leh Kyle Walker te a hmang zel bawk.

England ram league sang ber Premier League champion midfielder Danny Drinkwater ko duh lotu Hodgson-a'n Leicester City striker Jamie Vardy bul a ṭantir chuang lo a, talent neih ṭhat vanga a koh Jack Wilshere-a'n beisei a phak loh hnuah pawh khelhna hmun a hmu zel. Euro 2016 aṭanga an tlak thlengin England-in an ṭhat theih dan ber an hre lo a, khelh dan phung nghet nei loin player hming langsar ngaih pawimawhna a reh thei lo. Hodgson-a hnuaiah Manchester United forward Rooney aia ṭha English midfielder zingah an awm lo niin a lang a, chu chuan England dinhmun a sawifiah thui viau bawk.

Mualphona chu

England-in bul an ṭan ṭha a, Iceland lakah team ṭha zawk anni tih pawh a lang nghal. Amaherawhchu England-in captain Rooney penalty chhuih luh hmanga an hmahruaina an hmang ṭangkai lo. Spurs forward Kane leh midfielder Delle Alli te rumṭhaihna chuan Iceland chhiatna a thlen phak lo a ni.

England tlarhnung phui ṭha tawk lo erawh an chak loh chhan a ni thung. Iceland captain Aron Gunnarson-a throw-in na zet chu Kari Arnason-a'n tauh pialin Sigurdsson-a'n a pet goal chiang hle.

Sigthorsson-a'n Iceland goal hnihna a thunna kawngah England tlarhnungin harsatna an siam tam tawk lo a, FC Nantes forward a thiam rualin Manchester City keeper Joe Hart-a'n a tihtur a ti tawk lo.

Goal mamawh England aiin Iceland-in goal khungna chance an nei ṭha zawk - Ragnar Sigurdsson bicycle kick te, right back Birkir Saevarsson leh captain Aron Gunnarsson-a ball pet chu vanneih ṭum chu ni se England mualphona a belhchhah thei ngei ang.

Vannei maw?

Iceland hian coach pahnih Heimir Hallgrimsson leh Lars Lagerback an nei a, Swedish player ropui Fredrik Ljungberg chher chhuaktu Lagerback a awm miau avangin vanneih vanga chak chu an ni bik lo.

Euro 2016 zawha coach hna chawlhsan tur Lagerback hian Sweden chu Euro 2000 a thlen pui a, 2002 World Cup-ah England, Argentina leh Nigeria awmna group an paltlang a, Euro 2004-ah quarterfinal thleng lehin 2006 World Cup-ah knockout stage thleng lehin Sweden history-a a vawi khat nan inelna lianah an zawnin vawi li an inlan. Swedish pachal hian football kalhmang a hria a, tun ṭuma an chetṭhatna kawngah pawh hian lang vak si loin a kut hnua awm nual ang.

Iceland coach Lars Lager-back chuan, "Team pumpui thawhrah a ni. Goal venhim kawngah player zawng zawngin an tihtur an ti vek a, goal nawr kawngah pawh kan che chhe lo. Football-ah chuan chak a pawimawh ber a, a bak chu goal tam thei ang ber khung a ni," tiin a player-te thawhrah a nih thu a sawi.

Iceland coach pakhat zawk Heimir Hallgrímsson chuan, "Kan naute hi rin phak bak an ni. Match tinah an rilru huaisen zia a lang zel a, England kan hneh
ṭum hi kan khelh ṭhat ber ṭum a ni hial ang. Hei erawh ka sawi hram duh, Iceland ṭhat dan ber hi kan la hmu loin ka hria," tiin beisei a la neih zel thu a sawi lang.

England hnehtu Iceland hian Pathianni zan hian inelna thlengtu France an hmachhawn dawn a, inkhel result a zirin England mualphona hi a la belhchhah thei a, a ziaawm thei bawk.