Tualchhung Transfer Player lak nan ni 2 chiah

MFA-in season thar aṭangin Mizoram pumah transfer hun inang khat hman a rawt a, Mizoram Premier League club pariatte leh district hnuaia club-te tan player ziah luh nan ni hnih chiah a awm tawh - June 30 hi transfer tawp hun a ni.

MPL club pariat zing-ah Chanmari FC chiahin MFA Registration Com-mittee hnuaiah player an la ziak lut a, MPL2 champion hian player 23 hming an thehlut a, tualchhung player bakah foreign striker an la lut dawn niin sawi a awm.

Chanmari FC-in MPL hruai thlengtu coach Lalsangzuala Hmar chu Bethlehem Vengthlang FC aṭangin an la let. Republic VT striker Lalruatfela, Champhai VT defender Lalmuanawma leh BVT defender Lalrammawia ten MFA Super Cup cham-pion BVT aṭangin an club hlui lamah an let a, anni bakah hian defender MS Dawngzela (Notea) leh Ramfangzaua ten coach Sanga hnung zuiin Chan-mari FC an zawm bawk.

MPL2 champion hian Mizo winger beiseiawm an la lut nual bawk. Aizawl FC aṭangin Lalmuan-zova, Chanmari West FC aṭangin Vanlal-biaa Chhangte leh Dinthar FC aṭangin Isaac Lalruatpuia te an la lut a, Venghlui rawlthar duhawm Lal-
ṭhasiama an nei sa bawk.

Chanmari FC lakluh zinga thawm nei lian ber chu Aizawl FC aṭanga R. Malsawmtluang an la let thei hi a ni a, MPL2 best player hi Chanmari tlangval Rochhingpuia leh Reuben Zosangpuia te nen midfield laiah an inkawp chho tur hi a hmuhnawm ang. Tlar-hmaah Malsawmfela chu team innghahna a la ni reng a, Tlangpui tlangval Zothanpuia'n MPL5-ah hming chher a tum dawn.

Chanmari FC hian tlarhnungah captain Lalrinchhana Tochhawng, C. Lalrosanga leh David Lalchhuanawma te an la kawl sa a, Aizawl FC-ah Lalhriatrenga (Achia) chan mah se AFC aṭangin Thomas Lalengkima an la lut a, BVT aṭanga an lakluh Muanawma, Notea leh Zautea te nen tlarhnung an ngaihtuah awm lo ang.

Season tharah Chan-mari FC-in keeper ngai an chhawr dawn a, Khawbung tlangval F. Lalmuanawma leh Chanmari tlangval MS Dawngliana ten khelhna hmun an inchuh dawn a ni.

Chanmari FC hian winger ṭha pathum R. Lal-danmawia, Lal-nun-mawia leh Vanlalthla-muana, postion hrang hranga chhawr theih Joseph Lalnunpuia leh right back Achia te an chan a, player ṭha la lut nual mah se season liam ta an tluk phak leh phak loh chu season ṭan hnuah chauh a hriat ang.