England manager Hodgson a bang

England-in Euro 2016 last 16-ah Iceland an hneh lo a, manager Roy Hodgson a bang nghal a, a thachhang dawltu Ray Lewington leh Gary Neville ten an hna an kalsan nghal bawk.

Kum 68-a upa Hodgson hian kum li kal ta khan Italian manager Fabio Capello thlakin England manager hna a thawk ṭan a, inelna lian thamah match 11 enkawlin vawi thum chiah hnehna a chang.

Euro 2016 qualifier-a a chet ṭhat vangin England-in beiseina sang tak nei mah se France ram zin pha china ranking hniam ber Iceland (34-na) hneh loin an tla. Hodgson chuan, "Ka thiam loh a ni a, heti hian ka hun tawp ka hman a ṭul ta a ni. Tunah chuan rawlthar duhawm tak tak hlawhtlinna duha tuihal te hian enkawltu thar an mamawh an ni. England-in inelna lian tham final an thlen phak thuai hi ka beisei tlat a ni," tiin a ban thu sawi.

Football Association chuan, "Ram pumin kan ngui a, hun lo taka Euro 2016 aṭanga kan tla hi ka pawi kan ti hle a ni. Tun aia thui hi thlen theih kan inbeisei a, ram mipui beisei kan pha lo bawk. Roy Hodgson-a banna hi kan pawm a, kan kal zel dan tur pawh kan tichiang thuai ang," tiin thuchhuah an siam ve nghal.

England hian qualifier-ah match 10 khelin an chak vek a, inelna takah erawh beisei an pha lo. Russia nen 1-1 a an inhnehtawk hnuah Wales 2-1 in lehthal mah se Slovakia nen goal awm loa an inhnehtawk avangin Group B-ah pahnihna an ni a, final kalkawng harsa sawtin lang mah se awlsam ber tura ngaih Iceland hneh loin team ṭha a ngaih an hmachhawn hman lo.

English striker ropui Alan Shearer chuan, "Ka hriat theih china England team chet chhiat ber ṭum a ni. Kawng engkimah keini ai khan an chungnung a, minute 90 chhung khan awmze neiin kan khel lo a ni," tiin an ram team a sawisel a, England manager nih châk thu a sawi lang nghal bawk.

England captain Wayne Rooney chuan, "Kan chak loh chhan zawng zawng ka sawi rem lo. Football-ah chuan vanduai ṭum a awm a, kan khelh dan vang ni loin kan vanduai ve hrim hrim a ni," tiin a sawi thung.

Sap media lamin Roy Hodg-son thlaktu tur an inrinsiak nghal a, England Under 21manager Gareth Southgate chu rinkai ber niin Gary Neville, Crystal Palace manager Alan Pardew, Bournemouth manager Eddie Howe leh Celtic boss thar Brendan Rodgers te chu lamrik zingah an tel.

England manager ni tawhte record

# Manager Career Pld Won Win %

1 Fabio Capello 2008-12 42 28 66.70%

2 Alf Ramsey 1963-74 113 69 61.10%

3 Glenn Hoddle 1996-99 28 17 60.70%

4 Ron Greenwood 1977-82 55 33 60%

5 Sven-Goran Eriksson 2001-06 67 40 59.70%

6 Roy Hodgson 2012-16 56 33 58.90%

7 Walter Winterbottom 1946-62 139 78 56.10%