FA-in Hodgson-a thlak tur zawng uluk

Football Association-in England manager nghet neih hma chu Roy Hodgson thlak turin Under 21 enkawltu Gareth Southgate chu manager lailawk tura rin a ni.

England-in Euro 2016 knockout stage-ah Iceland an hmachhawn a, awlsam taka quarterfinal lut tura beisei an nih laiin 2-1 in an chak lo. Last 16 aṭangin champion tura rinkai Spain leh Croatia te an tla ve tho a, ram pahnih erawh an hneh loh ram Italy leh Portugal an nih avangin England angin an mualpho ve lo.

Kum 68-a upa Hodgson chuan, "Lei lian tak siam ṭhat tur kan nei a ni. Iceland lak hneh ilang chuan siam ṭhat a ṭul kher lo ang," tiin a sawi. England tan mipui 330,000 lek awmna ram Iceland hneh loh hi a zahthlak a, an ṭhenawm ram Wales-in quarterfinal an thlen bawk avangin nasa taka insiam-
ṭhat an tum hi a mak lo.

Southgate chungchang zawhna chu FA chief executive Martin Glenn chuan, "Kan ngaihtuah ang. World Cup qualifier-a bul min ṭanpuitu tur hi kan mamawh a, mah se ruahman lawkna kan la siam lo. Team enkawl tur hi hming ang zawngin kan thlir lo a, chutihrualin England enkawl lai lawk tur chuan Southgate hi chu a awm ang ber a ni," tiin a chhang.

FA chief executive Glenn chuan an duh ang coach nei tur chuan thla chuang fe an zawn a ṭul theih thu a sawi a, England manager hlawh a tam bakah player an neih ṭhat avangin Hodgson hmunruak hnawh khat châk an tam hle.

Arsenal manager Arsene Wenger chuan Emirates Stadium-a cham turin kum khat chiah contract a nei tawh a, England manager ni theih zingah French pachal hming hi a ri ring hle. Glenn chuan, "Kum khat tawp nghah a ngaih chuan World Cup qualifier a tibuai thei ang. Chutihrualin thil awm ang tak a ni a, thil thleng thei lo chu ka ti duh lo a, amaherawhchu a thlen erawh ka ring lo zawk," tiin a sawi.

QPR manager hlui Harry Redknapp chuan, "An ṭha tih hriat tawh manager Steve Bruce leh Sam Allardyce te awm laia Gareth Southgate an thlang a nih chuan a dik lo ang. Southgate hi pa fel tak chu ni mah se a tih tawh?," tiin manager lailawk tura rinkai ber Southgate a sawisel nghal.

English stiker ropui Alan Shearer chuan an ram team enkawl hi a hreh loh thu a sawi tawh a, amaherawhchu team enkawl kawnga tawnhriat nei tlem hi an thlan a rinawm loh. Liverpool legend Jamie Carragher chuan England enkawl turin United States coach Jurgen Klinsmann a duhthu a sawi thung.

Kum 38-a upa Carragher chuan, "Jurgen Klinsmann hian Germany enkawlin World Cup semifinal a thleng tawh a, Copa America semifinal-ah United States a hruai thleng tawh a, kan ram a hriat chian bawk avangin England manager turin a ṭha ang," tiin a lo sawi ve bawk.

England manager tur an inrinsiak mek a, media ṭhatna hmun a nih bawk avangin Euro 2016 quarterfinal thleng pha lo mah se an chanchin hi khawvelin an ngaihven tho ang.