Aizawl FC tlarhnung an hraw

MPL champion lai Aizawl FC-in nimin khan MFA registration committee hnuaiah player 22 an ziak lut a, an player neih dan thlir-in an tlarhnung hi an in-chhuanna ber tur niin a lang.

Aizawl FC hian Manipuri keeper Soram Poirei chhuahtir mah se MPL season li chhunga best keeper ni vek thei Lalawmpuia leh MPL1-a Dinthar FC champion puitu Zothanmawia te an la kawl a, Mizo keeper
ṭha pahnih hian khelhna hmun an inchuh ang.

K. Malsawmkima enkawl tur AFC hian Chanmari FC aṭangin Lalhriatrenga (Achia) leh Zo United aṭangin Lalrinzuala Khiangte te an la lut a, defender
ṭha Lalruatthara, Lal-ramchhul-lova, Ricky Lallawmawma leh Lalṭhakima-te an la kawl bawk avangin MPL-a defender nei ṭha bera chhal ngam an ni.

Aizawl FC-in ve-te-ran mid-fielder Ro-hmingthanga ziak lutin H. Lalbiakthanga, Brandon VL Remdika, B. Zoramthara leh William Lalnunfela te an nei bawk, an player hlui Lalnuntluanga chu Zo United aṭangin la let mah se an tlarhma hi team dang aia an ṭhatna a awm bikin a lang lo.

MPL champion hian foreigner an la ziak lut lo a, Mizoram Police aṭanga an hawh F. Lalrinpuia leh Lalbiakhlua- te an neih tawh loh bawk avangin nomawi humhim tur chuan tlarhma tichak turin foreign striker ṭha tak chu an mamawh ngei ang.

Mizo zinga I League club hmasa ber AFC hian an academy
aṭangin senior team-a sawn chhoh an nei nual a, chung zingah chuan Lalawmpuia Hnamte leh Rochharzela te chu MPL-a hming chher thei tura beisei an ni.