Newcastle keeper thar Sels

Premier League aṭanga tla thla hlim Newcastle United chuan Belgian club Gent aṭangin goalkeeper Matz Sels chu kum nga chhung atan an la lut. Cham-pionship club manager Rafael Benitez-a'n a player lakluh hmasak ber a ni.

Belgium Under 21 tan pawh a lo khel tawh Sels hian season 2014-15 khan Gent chu Belgian league-ah a champion pui a - a season lehah Champions League-ah an inlan nghe nghe.

Kum 24-a upa Sels chuan club thar a nei chu a lawm thu a sawi a, Magpies manager Benitez pawhin, "Matz kan lo lawm a, theihna sang tak a neih avangin club dang pawhin an ngaihven tih ka hria. Ani kan la lut thei hi a lawmawm hle," a ti.

Newcastle hian senior goal-keepers - Karl Darlow, Tim Krul leh Rob Elliot te an nei sa avangin Sels tan hian hmun nghet chan nghal ngawt beisei chi a ni lo ang.

Mahse, season hmasaa hliam vanga inkhel mang lo Krul chu Premier League club lama kal tur anga sawi a ni a, Elliot pawh a khup na vangin season tir lamah a hmel kan hmuh a beisei awm loh bawk.