Wimbledon A hnampui lakah Murray a chak

Andy Murray chuan Wim-bledon bikah a vawi khat nan British mi Liam Broady a hma-chhawn a - seeded pahnihna Murray hian 6-2, 6-3, 6-4 a hnehna changin second round a lut. Second round-ah kum 29-a upa Murray hian Chinese Taipei tlangval Yen-Hsun Lu a hmachhawn leh ang.

Centre Court-a inkhelah Britain number 1 Murray a khel
ṭha tak zet a, a service hmasa 77% zet ti dikin ace vawi riat a siam a, double faults vawi khat chiah a ni bawk. Hnehna chang tur hian darkar khat leh minute 42 chiah a mamawh. World number 235 hian break point vawi hnih chu hmu ve bawk mah se Wimbledon khelhna hmun pui bera a vawi khat inlannaah hian chak turin a hun
ṭha neih a chhawr ṭangkai thei lo.

2013 Wimbledon champion Murray chuan, "Liam nen khan hnehna chan kan duh ve ve a, inkhel entute pawh khan kan pahnihin chak turin min duhsak. Pakhat chauh second round luh theih a nih avangin a chak zawka ka ṭang kha ka vannei. Ani pawh court a chhuahsan dawna entu mipuiten ding chunga duhsakna an lantir avang khan a lawm ve tho ka ring," tiin inkhel entuten British player pahnih an duhsak thu a sawi.

World number 2 Murray hi Grand Slam vawi hnih a champion theih nana lo kaihruai tawhtu coach Ivan Lendl nen Wimbledon ṭan hma deuh khan an thawk duh leh tawh. Tennis ngaina British mipuiten an ram leilung ngei a an ram mi champion hmuh an duh avangin Murray-a mawhphurhna hi a sang hle.

Stan leh Del Potro pawh

French Open champion hlui Stan Wawrinka leh US Open champion lo ni tawh Juan Martin del Potro te pawhin an khingpui hnehin first round an paltlang. Seeded palina Wawrinka hian kum 18 chauha upa Taylor Fritz chu 7-6, 6-1, 6-7, 6-4 in a hneh.

Swiss thiampuipa Wawrinka hi Australian Open leh French Open-ah a champion tawh a, US Open-ah semifinal a lut tawh bawk. Grand Slam pali zingah Wimbledon chauh hi a sang pali zinga a la tel ngai lohna a ni a, kuminah hian beisei a nei sang hle.

Kum 31-a upa Wawrinka chuan, "Fritz nen hian Madrid-ah kan lo practice dun tawh a, a theihna san zia leh thiam zia ka hria. A kum a la tam lova, a service a ṭhat bakah back hand a neih ṭhat avangin hmabak êng tak a neiin ka hria," tiin a sawi.

2014 Australian Open hnua a ban rek na vanga Grand Slam khel ve leh chauh Del Potro pawhin France tlangval Stephane Robert chu 6-1, 7-5, 6-0 in a lo hneh ve bawk.

Kum 2013 khan Argentine Del Potro leh world number 1 Novak Djokovic te chuan Wim-bledon chanchina semifinal-a inkhel rei ber record an lo siam tawh - darkar li leh minute 43 zet an inkhelh hnuah Djokovic-a'n hnehna a chang a, a champion zui bawk. Kuminah hian an chak chho zel a nih chuan an intawng leh lo ang tih a sawi lawk theih loh.

Inkhel dangah Nick Kyrgios chuan kum 37-a upa Radek Stepanek a chu darkar hnih leh minute 26 chhungin 6-4, 6-3, 6-7, 6-1 in a hneh a, Czech Republic star Stepanek hian tun hnai kum 25 chhunga Grand Slam champion thei upa ber nih a tumna kawng chu first round-ah a tawp.

Seeded 15-na Kyrgios hian second round-ah nikum lama champion tura rinkai Rafael Nadal lo hneh tawhtu Dustin Brown a hmachhawn leh ang. Brown hian a match hmasa berah Serbian tlangval Dusan Lajovic chu inkhel inhnehtawk takah 4-6, 6-3, 3-6, 6-3, 6-4 in a lo hneh tawh a ni.