Wimbledon Serena chak nuamsa nghal

Serena Williams chuan Thawh-lehni zan khan kumin Wimbledon-a a match hmasa ber a khel. Champion lai Serena hian Amra Sadikovic lakah harsa lo takin 6-2, 6-4 a hnehna changin second round a inhlangkai.

Seeded pakhatna Serena hi a khelh ṭhat ber ni a ni hran lo a, world number 148 laka hnehna chang tur hian darkat khat leh minute 13 a mamawh bakah double fault vawi nga a neih laiin ṭum li chauh aces a siam thei. Hetih lai hian a service hmasa aṭangin 69% zet a ti dik thung - a chhe hran lo.

Kum 34-a upa Serena hi Wimbledon-ah hian vawi ruk a champion tawh. Grand Slam pali zinga an ngaihhlut bera ngaihah hian ṭum ruk champion tawhin he hmunah hian vawi 80 hnehna a channa chiah niin ṭum 10 chu a chak lo lamah a ṭang ve tawh.

Grand Slam vawi 21 cham-pion tawh Serena chuan, "Ka beisei aiin inkhel hautak a ni a, ka khingpui kha a ṭha lo e ka tihna ni loin ka beisei phak bakin a ṭha ka tihna a ni zawk. Wimbledon kan khel leh ta hi a nuamin a hlimawm a, vawiin hian ka nu chu Royal Box-ah a ṭhua a nuamin a lawmawm hle," tiin a sawi. American star Serena hian second round-ah chuan Daniela Hantuchova 7-5, 6-2 a hnehtu Christina McHale a hmachhawn leh ang.

Royal Box chu

Wimbledon khelhna hmun-pui ber Centre Court chhunga 'Royal Box' hi kum 1922 aṭanga an siam ṭan tawh kha a ni a, seat 74 awmin British lal chhungkua leh mi pawimawh bakah sawm bikte ṭhutna hmun a ni. Sorkar mi pawimawh, tennis khawvela mi hmingṭha, tournament sumdawnna lama thawhpui, British sipai, thuthar thehdarhtu hruaitu lian te bakah British tennis hmasawn theih nana thawhhlawk te an ṭhu tlang pui.

Royal box hmuna ṭhu tur hi Championships’ Organising Committee, The Lawn Tennis Association thurawn angin All England Club chairman chuan a sawm ṭhin. Helai hmuna ṭhu tur chuan incheina thlengin uluk a ngai a, organiser lamin an ei leh in tur an lo buatsaih sak ṭhin bawk.

Wozniacki a tla!

Wimbledon ni hnihna hi ruah sur vangin inkhel ṭhenkhat tih khawtlai a ni, Centre Court erawh a chung khuhna a awm avangin inkhelh a bahlah phah lo - world number 1 hlui Caroline Wozniacki chu Svetlana Kuznetsova lakah darkar khat leh minute 24 chhungin 7-5, 6-4 in a chak lo nghal.

World number 14 Wozniacki chuan a match hmasa bera a khelh danah a lungawi thu sawiin, "First round khelh dan tura duhthusam a ni, ka beisei aiin ka khel ṭha a, ka lawm takzet," a ti. Russian star hian Alison Van Uytvanck hnehtu Tara Moore a hmachhawn leh ang.