AC Milan-ah Montella

Tun hnaia manager nghet nei hleithei lo AC Milan chuan coach thar an nei leh ta. Italian club lian Milan hian Vincenzo Montella chu kum hnih chhung atan contract thar an ziah pui.

Italy international hlui kum 42-a upa Montella hian season hmasa khan Sampdoria a enkawl a, league-ah point 40 hmuin 15-na dinhmun a luah pui. Tunah chuan a hna kalsanin club lian zawka ngaihah chona thar a hmachhawn dawn a ni.

San Siro club hian season nga chhung zet chu nomawi an chawi thei lo tawh a, kum 2014-a Massimiliano Allegri an ban hnuah Milan hian coach pali an neihna chiah a ni. An duh loh Allegri erawhin Juventus panin Serie A leh Coppa Italia-ah nomawi a chawi pui tawh thung.

Milan joint-chief executive officer Adriano Galliani chuan tun hmaa an lo ropui tawh ṭhina ang kha neih let leh an thum thu leh hmaswn an tun thu a sawi a, coach thar chu an bul ṭanna chauh a nih thu a sawi tel bawk.

Champions League-a vawi sarih champion tawh Milan hian season an hmang ṭha lo a, Serie A-ah point 57 hmuin league table-ah pasarihna an ni phak chauh a, Coppa Italia final lut mah se Juventus an ngam lo - season tharah chuan Champions League an khel phak dawn lo a ni.