Pique-a'n Spain khelh dan a ring zo lo?

Spain international defender Gerard Pique chuan an ram football khelh dan phung chu inenfiah a ngaih thu leh hlawhtlinna chan chhunzawm pui zel tlak a ni em tih chu inbihchian ngaia a hriat thu a sawi.

Vicente del Bosque kaihhruaina hnuaiah Spain hian passing game rang takin an khel ṭhin a, an khingpuite goal na takin an nawr ṭhin. Attacking game mawi khel chungin 2008 Euro-ah an champion a; 2010 World Cup-ah hlawhtlinna chan chhunzawmin Euro 2012-ah an nomawi an humhin chhunzawm bawk - khawvelin Spain football a ngaisang a, hneh theih loh ang maiah a ngai hman.

Amaherawhchu, hun a lo kal deuh a. 2014 FIFA World Cup-ah khan Spain hi champion tura rikai ni chungin group stage pawh an paltlang lo - midfielder Xavi leh Xabi Alonso ten ram tana inkhelh an chawlhsan zui bawk.

Euro 2016 a lo her chhuak leh a, Group D-ah Croatia hneh lo mah se Czech Republic leh Turkey an hneh avangin last 16 an inhlangkai tho. Mahse, knockout round-ah hian team ṭha lo zawka ngaih Italy lakah 2-0 in an chak lo a, goal tam zawk chhuah thei dinhmunah an ding bawk!

Kum 29-a upa Pique chuan, "Inenfiahna tur ṭha tak a niin ka hria, kan khelh dan kalphung leh kan level hi en let a ṭul. Tun hmaa kan dinhmun kha kan phak lo tih a chiang," a ti.

An team a hmuh dan sawi chhun-zawmin Barcelona centre back chuan, "Kan hming leh sulhnu en chuan hnehna chang thei tur kan ni. Mahse, team ṭha ber kan ni lo a, champion nomawi chawi thei turin kan ṭha tawk lo bawk. Kan chak lohna aṭang hian inenfiahin mipui rinkai ber pawh kan ni loh tih kan inhmuh thiam a pawimawh," tiin a sawi.

Del Bosque hian 2014 World Cup group stage an paltlang zawh loh hnu khan a hna a bansan dawn niin a lang hmang a, mahse a cham. Euro 2016 zawha chawl tur anga sawi ni leh mah se a hna hi a kalsan dawn em tih a la chiang lo.

Real Madrid coach hlui chuan, "Spanish federation president nen kan inbia ang a, Spanish football tana ṭha ber tur kan ngaihtuah ang. Ka ngaihdan chuan kan hun a la tawp lo - academy leh player ṭha tak tak kan neih bakah club ṭha kan nei bawk," tiin Spain football vanglai a la liam loh thu a sawi ve bawk.