Barcelona hnartu Dybala

Paulo Dybala chuan Barcelona aṭanga sawm-na duhawm tak a hmuh chu a hnawl thu a agent Pierpaolo Triulzi-a'n a sawi chhuak.

Kum 2015-a Palermo aṭanga euro maktaduai 40 zet a Juventus zawmtu hian season hmasa khan Serie A-ah goal 19 khungin Napoli striker Gonzalo Higuain chiah tluk loh a nei a - Turin club hi league nomawi a chawi pui.

Kum 22-a upa striker langsar ni chho mek Dybala theihna san zia chu Catalan club lamin an lo hmuh hmaih lo a, euro maktaduai 80 zetin Nou Camp lama sawm luh an tum niin thuthang a awm.

Pierpaolo Triulzi chuan, "Juventus-ah hian a awm reng ang ngem tih zawhna kan dawng hnem a, transfer lai chuan thu leng vak a tam ṭhin. Paulo hi a thil tumah a chiang a, tun hnai mai pawh khan Barcelona chuan tuna a hlawh aia ṭhahnem daih hlawh turin an sawm, mah se Turin-a cham chhunzawm a thlang zawk," tiin a sawi.

Argentina interna-tional chungchang sawi chhunzawmin,"Tun hmain Milan club pahnih pawhin lakluh an lo duh tawh a, mahse a hma hun thui tak a thlir hnuah Juve zawm a thlang. He hmunah hian a hlim bakah hmasawn zel theih pawh a inbeisei," tiin a sawi bawk.