Euro 2016 Zaninah Lewandowki leh Ronaldo-te awmna Poland vs Portugal

Portugal-in Cristiano Ronaldo an neih avanga awlsam taka European Championship semifinal thleng tura ngai an awm a nih chuan a dik lo, an hmachhawn tur Robert Lewandowski telna Poland hi group stage-a world champion Germany draw thei an ni.

Zanin dar 12:30 hian Stade Velodrome, Marseille-ah European Championship quarterfinal match hmasa ber khelh a ni dawn. Portugal leh Poland inkhela chak zawk hian semifinal-ah Wales leh Belgium chak zawk an hmachhawn dawn a, ram pali hi Euro-a la champion ngai lo vek an ni.

Head to head

Poland hian Portugal vawi 10 an hmachhawn tawhah vawi thum an hneh a, vawi li chak loin vawi thum an inhnehtawk.

Euro qualifier-ah vawi li inhmachhawn tawhin Portugal hi vawi hnih an chak a, Poland hi vawi khat chakin, vawi khat dangah erawh chak zawk an awm lo. Euro inelna takah erawh ram pahnih hi an la intawng lo a, zanin hi an vawi khat inhmachhawnna tur a ni.

Euro Sulhnu

Poland hian a zawna Euro vawi thum an khelhna a ni a, Euro 2016 hma hian inelna takah chak an nei lo (D3, L3). Tun inelnaah hian a vawi khat nan quarterfinal an thleng a, Swiss midfielder Xherdan Shaqiri goal ropui bak an lamah a la lut lo.

Zanina an inkhelhna tur Stade Velodrome, Marseille-ah hian Poland hi vawi hnih an inkhel tawh. Group stage-ah Ukraine chu 1-0 in an hneh a, kum 1990 khan friendly match-ah United Arab Emirates chu 4-0 in an hneh. 

Portugal hian Euro hi vawi sarih an khel tawh a, tun ṭum hi a zawna vawi ruk an khelhna a ni. Ronaldo te ram hian group stage an la paltlang ziah a, an thlen san ber chu Euro 2004 an rama an khelh ṭuma Greece an hneh loh vanga pahnihna an nih ṭum kha a ni.

Marseille-ah Portugal hian chak an la nei lo. Euro 1984 khan Spain nen Stade Velodrome-ah 1-1 in an inhnehtawk a, semifinal-ah France 3-2 in an hneh lo. 

Lewandowski leh Goal?

Poland captain Robert Lewandowski hian goal 13 khungin Euro qualifier-ah goal a khung hnem ber. Bayern Munich striker Lewandowski hi inelna ṭan hmain golden boot (top scorer) dawng tura rinkai ni mah se match li khelh tawhah hun pangngaiah goal a la khung lo. Season liam taa Bayern tana match 51-a goal 42 khung thei Lewandowski leh goal tih hi thil inhmeh tak a ni a, scoresheet-a hming nem kai lo chuan France chhuahsan a hreh khawp ang.

Lewandowski-a'n goal la khung lo mah se Poland-in Milik leh Jakub Blaszczykowski te hnen aṭangin an mamawh ang tawk goal an la nei ve zel. Ajax striker Milik hian Euro 2016 bul a
ṭan ṭha a, kum 22-a upa striker hian beisei a phak lo chhunzawm. Goal hmaa Poland tana hriam ber chu Borussia Dortmund aṭanga loan hmanga Fiorentina-a kal Blaszczykowski a ni a, kum 30-a upa winger hian match hnuhnung pahnihah goal hnih a khung.

Hming langsar ni si loah chuan midfielder Grzegorz Krychowiak hi team khaipa a ni a, Northern Ireland an hneh
ṭumin match of the match-a thlan a nih bakah Switzerland an hneh ṭuma penalty aṭanga chakna goal khungtu a ni. Sevilla midfielder Krychowiak hian defence a pui ṭha a, Europa League-ah vawi hnih a champion tawh avangin stage sanga buai tur a ni lo a, Spanish club a champion pui
ṭum hnih hian UEFA Europa League Squad of the Season-ah thlan a ni ve ve a, 2014-15 season khan La Liga Team of the Season-ah telh a ni tawh bawk.

Ronaldo a langsar

Cristiano Ronaldo hming a lansarh em avangin a khelhpuiten an phu tawk ang fakna an dawng pha lo. Real Madrid forward hian Hungary an inhnehtawk pui ṭumin goal pawimawh pahnih a khung bakah Nani goal khung tur a siam sak bawk. Last 16-ah Croatia chak zawk tura rin ni mah se Ronaldo thawhrah sengin Ricardo Quaresma-a'n chakna goal a khung a, Portugal tan an captain hi a ṭangkai a ni.

Chutihrualin Manchester United-a Ronaldo khelhpui ṭhin Nani hi team innghahna a la ni pha a, Quaresma-a'n hmun nghet chang pha lo mah se danglamna thlen thei turin theihna leh tawnhriat a nei. Portugal hian nikum khan UEFA U21-ah pahnihna an ni a, hmabak nei êng player an kawl nual. Winger hmuhnawm Joao Mario te, left wing back Raphael Guerreiro leh midfielder William Carvalho te hi U21 inelnaa Portugal innghahna an ni a, senior team-ah pawh player pawimawh ni phak an ni.

Bayern Munich-in manto taka an lak avangin Renato Sanches-a'n ngaihven a hlawh a, Croatia nen an inhmachhawn
ṭuma a khelh ṭhat avangin sawi hmaih a thiang lo. Kum 18 leka upa ni mah se Sanches hi season liam ta khan Benfica tan player pawimawh a ni tawh a, tharum a ngahna te hmang ṭangkaia tlarhnung leh tlarhma a pui khawpte hi an fakna chhan pakhat a ni.

Engtin zel?

Portugal coach Fernando Santos chuan a hunah player rem dan a thiam a, Croatian midfielder Ivan Rakitic chet theih loh nana Adrien Silva leh William Carvalho te hna a pe thiam a, Austria an hmachhawn ṭumin David Alaba a lo dah ṭhattir tawh bawk. Santos hi tun inelnaa substitution hmang thiam berte zinga mi a ni a, Croatia an hneh ṭumin bench aṭanga lut Renato Sanches leh Ricardo Quaresma te chu inkhel thlak danglamtu an ni.

Kum 61-a upa Santos chuan, "Chak turin game mawi ber khelh reng theih a ni lo," tiin a lo sawi tawh a, zanin pawh hian mawl mang takin Poland hi an nawr nghal buan buan lo ang.

Poland keeper Wojciech Szczesny chuan, "Portugal hi team ṭha tak an ni a, Ronaldo ringawta innghat an ni lo. Mi ṭhenkhat chuan Ronaldo hi a ṭhat theih dan berin a la khel lo tiin an sawi a, tuna a khelh tawh dan chinah pawh hian kan team-a khel turin ka duh. Ronaldo bakah hian Renato Sanches hian mit a la viau bawk a, kan hmabak hi a awlsam dawn lo a ni," tiin a sawi.

Poland first choice keeper Szczesny hian inhliam vangin Northern Ireland an khelh ṭumah chiahin a la inlan a, tunah hian training zawm leh tawh mah se Switzerland an hneh ṭuma cheṭha goalkeeper Lukasz Fabianski a khelh chhunzawm rin a ni.

Penalty shootout

Portugal hi Group F-ah Hungary, Iceland leh Austria nen an awm a, an khingpuite hi team ṭha niin lang lo mah se vawi khatmah an chak lo. Fernando Santos hote hian match thum khelh aṭangin point thum an hmu a, tun inelnaah minute 90 chhungin hneh an la nei lo.

Knockout stage match hmasa bera Croatia an hmachhawn hma pawhin Portugal hian penalty pet a zir nasat thu an sawi a, hun tawp hma hreta Ricardo Quaresma goal hmangin penalty shootout an pumpelh hlauh. Inelna lian thamah Portugal hian vawi thum penalty shootout hmachhawn tawhin vawi hnih an chak. EURO 2012 khan Spain nen goal awm loa an inhnehtawk hnuin penalty-ah hnehna an chang a, 2006 World Cup leh Euro 2004-ah England chu penalty shootout hmangin an hneh ve ve bawk.

Poland hian inelna lian thamah vawi khat chiah penalty an la pet a, Switzerland laka hnehna an chan avangin zanin hian Portugal an hmachhawn theih phah. Adam Nawalka hote zinga penalty pettu Robert Lewandowski, Arkadiusz Milik, Kamil Glik, Jakub Blaszczykowski leh Grzegorz Krychowiak ten an pet goal vek.