PSG manager thar Emery

Paris St-Germain chuan Laurent Blanc an chhuahtir hnu lawkah manager thar an nei nghal. French Ligue 1 champion manager thar hi tu dang ni loin Unai Emery a ni - Sevilla boss hlui hian Paris-ah kum hnih cham turin contract a ziak a, kum thum dang pawhsei leh thei turin inremna an siam.

Thawhṭanni khan a zawna league champion vawi thum nih puitu Blanc chuan PSG hi a chhuahsan fel a, Emery hi French manager thlak tura an lo sawi rik tawh kha a ni.

Kum 44-a upa Emery hi player a nih lai chuan a ropui tehchiam lo a, a hun tam zawk chu Spanish second division lamah a hmang. Mahse, team enkawl hna a thawh hnuah erawh a hlawhtling hle a, tun hnai season thum chhungin Sevilla hi Europa League-ah a champion pui vek.

Spanish manager Emery chuan, "PSG-a chona thar hautak tak hmachhawn thei tura ka awm hi ka lawm a, tun hnaiah Europe-a club ṭha berte zinga mi a ni. Club ti hmasawn tur leh an thil tumte ti hlawhtling tura hun
ṭha ka nei thei tur hi ka lawmin ka tan chuan chawimawina a ni," tiin a sawi.

Valencia pawh lo enkawl tawhtu Emery hna hi a awlsam dawn lo - PSG thu neitute hi Ligue 1, French Cup leh League Cup champion nih vanga tih lungawi theih mai an ni tawh lo a, an duh ber chu Champions League nomawi a ni. Zlatan Ibrahimovic chuan Paris club hi a chhhuahsan tawh a, an club chanchina goal khung hnem ber hmun ruak luahkhat tur zawn hmuh pawh thil awlsam a ni lo ang.