Lille-ah Bale leh Hazard an intawng dawn Wales Vs Belgium

Euro 2016 qualifying-ah Wales-in team ṭha zawka ngaih Belgium 1-0 in an hneh a, he inkhela goal awmchhun khungtu Gareth Bale chuan, "Belgium kan hneh zan leh tuna kan dinhmun hi chu danglam tawh tak a ni a, tunah chuan team ṭha zawk kan ni tawh," tiin a sawi - zanin dar 12:30-ah team pahnih hian Euro 2016 semifinal luh an inchuh dawn a, Real Madrid forward thusawi dik leh dik loh a hriat thuai dawn.

Mumang ramah Wales an chen chhunzawm zel a, tun Euro hi kum 1958 World Cup-a quarterfinal an luh hnua major tournament-a a thiam pariat zinga an tel lehna hmasa ber niin an mumang ram aṭanga ṭhan harh an duh dawn lo - Belgium hian mumang rama cheng mek Wales hi an kai harh dawn nge? Mang an neih chhunzawm tir zel dawn? Zaninah a chhanna pekin a awm ang.

Wales tan Bale

Gareth Bale chuan qualifying round-ah Belgium chu an lo hneh tawh avangin an khingpuite aia an dinhmun a ṭhat zawk thu sawiin, "Belgium hian min lo ngam tawh lo a ni tih kha an thinlungah an hre reng dawn a ni. Eng team nge an nih kan hriat avangin kan hneh theih dan turin game plan kan siam ang," tiin a zam lo.

Real Madrid forward chuan sawi chhunzawmin, "Kum 1958 World Cup quarterfinal kan thlen kha kan hre reng a, Welsh football chanchinah chuan tun thleng hian sawi a la ni ṭhin. Tun hi thawnthu thar ziah hun a ni a, Wales flag hi sang zawka chawisan zel kan duh a ni," a ti.

Khawvela player manto ber Bale chuan amahah chauh team an innghah loh thu sawiin, "Player ṭha tak tak kan kawl a, kan bench-ah pawh danglamna siam thei player engemaw zat an awm. Team ṭha tak kan ni a, quarterfinal hi a chhan awm loin kan lut lo," tiin semifinal luh ngei an tum thu a sawi.

Bale hian player malah an innghah loh thu sawi mah se qualifying-a Wales goal 11 zinga goal sarih hi a khung a ni a, an goal zinga 82%-ah a inrawlh. Euro khelh mekah goal thum a khung tawh a, assist vawi khat a nei bawk - Belgium tlarhnung tan hmun awl pek loh a finthlak ang.

Khawtual tlangval Hazard

Lille khawpuiah Belgium leh Wales an inhmachhawn dawn a, an inhmachhawnna tur khawpui hi Belgium thiampuipa Eden Hazard-a'n a football nun bul a ṭanna a ni.

Belgium coach Marc Wilmots chuan, "Hazard hian naupangte nichungin Lille-ah a career a ṭan a, Lille-ah a seilian a, a professional nun a ṭan a, Lille hian engkim an pe a, a tan chuan he hmun hi a in a ni," tiin a sawi a, Hazarad a tlangnel dawn.

Hazard-a'n Hungary an hneh ṭumin a malpuiah hliam a tuar a, Belgium manager Marc Wilmots chuan, "100%-a a in fit theihna turin theihtawp kan chhuah a, Wales hmachhawn turin a dam chiang thei ang em tih hi ka sawi thei lo," tiin sawi mah se Lille leh Hazard a sawi zawm danah erawh Chelsea winger hi a inlan ngei dawn niin a lang.

Team pahnih inhmachhawn hnuhnung berah Belgium chak lo mah se Marc Wilmots-a naute hian a pumpuiah record an neih ṭhat zawk avangin Wales an hlau lo ang - vawi 12 inhmachhawnah vawi nga chak zawkah an ṭang a, vawi thum inhnehtawkin vawi li Wales an chak thung.

Belgium an ṭha tawk em?

Belgium-in an match hmasa berah Italy 2-0 in hneh lo mah se last 16 an luh meuh chuan Portugal laka goal thum khung thei Hungary chu 4-0 in an sawp a, Eden Hazrad-a goal ropui chu Euro 2016-a goal ropui zinga chhiar hmaih chi a ni lo.

Marc Wilomts-a'n tlarhmaah player duhthlan tur a ngah a, Kevin De Bruyne leh Eden Hazard bakah Divock Origi, Romelu Lukaku, Michy Batshuayi, Yannick Carrasco leh Dries Mertens a la nei cheu a, khawvel huap ang pawn an tlarhma hi an zahpuiawm loh.

Belgium buaina erawh an tlarhnung a ni - captain Vincent Kompany leh Nicolas Lombaerts te chu hliam vangin France-ah an hruai thei lo a, hrem vangin Thomas Vermaelen chuan Wales a hmachhawn theih dawn loh bawk avangin Gareth Bale-a leh a hote dang turin Wilomts-a'n ruahmanna a siam uluk a ngai ang.

Wales ve thung

Wales-in group stage-ah football hmuhnawm lantir mah se last 16-a Northern Ireland an hmachhawn ṭumin beisei an phak lo a, own goal hmangin Britain awpna hnuaia an awmpui ram hi 1-0 in an hneh hram. Tlarhma lamah Gareth Bale leh Aaron Ramsey te chu an innghahna an ni a, Belgium tlarhnung chhaih buai turin an ṭha tawk.

Midfield laiah 'Welsh Pirlo' tia hminglem an vuahsak Joe Allen a hmuhnawm ṭhin a, Liverpool midfielder hian Anfield lamah beisei ang hmun chang pha lo mah se Wales tan erawh player pawimawh pawl a ni a, a thawkrim takzet bawk.

Wales tan tlarhnungah Wes Brom centre-back James Chester leh Tottenham Hotspur left back Ben Davies te ṭangkaina hmuh hmaih theih a ni lo a, Eden Hazard leh a nauten tlarhnung lam remkhawm thiam Wales an paltlang theih dawn leh dawn loh hi hmuh a chakawm hle - zaninah engkim a chiang dawn.

Thlirna Tawi

Starting XI tura rin

Wales : Hennessey; Gunter, Taylor, Davies, Chester, Williams; Allen, Ledley; Bale, Ramsey; Robson-Kanu.

Belgium : Courtois; Meunier, Alderweireld, Denayer, Vertonghen; Witsel, Nainggolan; Mertens, De Bruyne, Hazard; Lukaku.

Hrem vanga khel lo tur

Belgium : Thomas Vermaelen

Yellow Card hmu tawh, fimkhur ngai player-te

Wales : Davies, Ramsey, Taylor, Vokes

Belgium : Vertonghen, Meunier, Witsel, Fellaini, Batshuayi

Quarterfinal kalkawng

Wales : 2-1 Slovakia; 1-2 England; 3-0 Russia; 1-0 Northern Ireland

Belgium : 0-2 Italy; 3-0 Republic of Ireland; 1-0 Sweden; 4-0 Hungary