Southgate-a'n England enkawl a châk lo

England manager Roy Hodgson thlaktu tur anga sawi hlawh mek Gareth Southgate chuan England team enkawl chakna a neih loh thu a sawi chhuak. England U21 manager hi Euro zawh ruala Roy Hodgson a ban hnuah manager lailawk ni tura beisei a ni a, mah se amah berin England hi enkawl chakna a neih loh thu a sawi chhuak ta a ni.

Thawhlehni khan FA chief executive Martin Glenn chuan Slovakia nen Sep-tember 4-a World Cup qualifier an khelh hmaa manager neih ngei an duh thu a sawi a, an manager duh ang an hmuh loh chuan England defender hlui Southgate chu manager lailawk ni tura beisei a nih thu a sawi bawk.

England enkawl tur hian season tawp ruala Arsenal-a a contract neihlai hmang zo tur Arsene Wenger, Paris St- Germain manger hlui Laurent Blanc te hming sawi rik a ni a, hming lam rik zingah West Ham boss Slaven Bilic chuan England a enkawl chak loh thu Hammers co-chairman David Gold-a'n a lo sawi tawh a, England coach tur hi FA chief executive Martin Glenn, FA board member David Gill leh technical director Dan Ashworth ten an ngaihtuah ang.