BS-a hnuaiah BVT an indinthar

Bethlehem Vengthlang FC-in MFA Super Cup-a champion puitu coach Lalsangzuala Hmar bakah an player eng emaw zat chu Chanmari FC lakah chan mah se coach Lalbiaksanga Colney hnuaiah indintharin dah hniam theih an ni lo.

BVT hian Luangmual FC tana season chawhnu lam chauh khel chunga MPL4 best goal-keeper nominee-a lang pha Mal-sawmdawngzela (Mala) an lalut a, tlarhnung tichak turin MPL4-a Dinthar FC bang rinawm Lalhlimpuia, Armed Veng defender ṭha Lalnghinglova (MP-a), Kolasib wing back Lalthanzama Fanai leh India sub junior tan pawha khel tawh Vanlalruata (Teruata) te an a la lut.

Midfield-ah Royal Wahingdoh tan pawha player pawimawh lo ni phak tawh Zosangkima, Pune FC Academy chhuak Lalrinawma Lianhna bakah Kolasib midfielder ball thiam Lalrintluanga (Tuka) te an nei a, season liam taa an player pawimawh Laldingngheta an la kawl bawk. Goal khung turin Chanmari FC aṭangin K. Lalchhanhima leh West Warrior aṭangin Lalramliana an la chhuak a, MPL2-a Luangmual FC final thlen puitu PC Zosanga an la kawl bawk avangin an goal nawr hi a na thawkhat tura ngaih a ni.

BVT secretary Lalruatfela Hmar chuan, "Keini hi chu Bethlehem Vengthlang mipui club kan ni a, mipui rinchhana kal kan nih avangin kan tlin tawkin kan kal a ṭul. Kan club-a khel duh player an awm nual a, amaherawhchu kan budget-in a tlin loh avangin player ṭha kan chan nual a ni. Eng pawh chu ni se tuna kan player neih te hi an ṭha a, season liam ta nena khaikhinin kan club budget tla hniam mah se result-ah erawh tlak hniam kan tum lo," tiin Vanglaini palai a hrilh.