Rinsanga hoin Zo United

Mizo coach zinga tawnhriat nei ṭha ber zinga mi C. Lalrinsanga'n MPL5 season ṭantirh
aṭangin Zo United a enkawl dawn a, Mizoramin Subroto Cup an champion hmasak ber ṭuma coach pui tur hi Luangmual FC coach Vanlalrova a nih bawk avangin MPL4 semifinalist team hi an ngaihtuahawm loh.

Zo United hian transfer tawp niah player 27 an ziak lut a, tawnhriat nei player an ziaklut nual nachungin an squad thlirin naupang zirtir thiam coach Rinsanga'n player ṭha chu a chher chhuak leh dawn niin a lang. Reitlang FC hming an put laiin MPL aṭanga Zo United tla mai tur chu veteran coach Benjamin L.Khiangte-in (Didina) a chhanhim tawh a, Belgian coach Philippe De Ridder-a'n a lo chhan chhuak tawh bawk.

Coach hming langsar Didina leh Ridder te hi an hlawhtling zui lo. Season liam ta khan Rinsanga hian Zo United chu tla thei dinhmun aṭangin semifinal a thlen pui a, tun season-ah fiahna tak tak a hmachhawn ang.