Italy kan hneh thei - Thomas Muller

Thomas Muller chuan Europen Championship semifinal lut turin Italy an hneh theih ngei a rin thu a sawi chhuak.

Inrinni zan dar 12:30 hian Germany leh Italy te hi quarterfinal-ah an inhmachhawn dawn a, champion tura rinkai pakhat zawk an tla dawn. Ram pahnihte hi Euro 2012 semifinal-ah an lo intawng tawh a - Azzurri an chak.

Antonio Conte kaihhruai Italy hi inelna ṭan hmain champion tura rinkai ni chiah lo mah se last 16-a Spain an hneh dan aṭangin team ṭha an ni tih a chiang. Match li an khelh tawh aṭangin goal khat chiah an la chhuah a, an goal an venghim ṭha.

Bayern Munich forward Muller chuan Italian tlarhnung chu sut hawn theih an nih thu sawiin, "Champions League-ah tawnhriat ka nei tawh a, Juventus nen kan inhmachhawn ṭumin match hnihah goal li kan khung thei. Italy hi Juve ang deuh tho kha an ni a, chuvangin an lamah hian a pet goal theih," a ti.

Kum 26-a upa Muller chuan sawi chhunzawmin, "Italy tlarhnung hi an khel ṭha ṭhin tih chu hmuh hmaih theih a ni lo, a chhan chu an theihna zawng zawng an hlan ṭhin vang a ni. Mahse, kumin Euro kan thlir chuan Germany aiin Italy hi an inveng ṭha tawk loin ka hria," tiin an khingpui tur a dah chungnung bik lo.

Germany international Muller hian FIFA World Cup-ah match 13 a khelh aṭangin goal 10 a khung thei. Mahse, Euro-ah erawh amah a ni lo emaw tih mai tur a ni. Euro 2012 khan match nga khelin goal a khung lo a, kuminah pawh match li khel leh tawhin a record duhawm lo hi a la thai chhe thei chuang lo.