Mumbai City defender thar Gerson Vieira

Indian Super League club Mumbai City chuan season thar atan Brazilian center back Gerson Vieira an lalut a, Vieria an lakluh hma hian Hungary international hlui Krisztian Vadocz an lo lalut tawh bawk.

Kum 23-a upa Gerson Vieira hian Brazilian club lar Gremio aṭanga a career ṭanin Uruguayan Primera Division club Atenas de San Carlos tan a khel tawh bawk a, season hmasa khan Brazil Serie D club Red Bull Brasil tan a khel.

Brazil U17 tan Neymar-te nen an khel ho ṭhin a, kum 2009 U17 World Cup Brazil squad-ah hial lang phakin Brazil U17 tan hian match 14 lai chu a lo inlan ve tawh a ni.

Hetihlai hian Mumbai player thar pakhat zawk Krisztian Vadocz hian Hungary tana vawi 40 a khel tawh a, ISL season hmasa berah khan Pune City tan lo inlan tawhin season hman zawh takah khan Australian League club Perth Glory tan a khel.