Champion tumin MPL5 kan khel ang - LCha

Mizoram Premier League hmasa ber champion Dinthar FC-in MPL hnuhnung ber-ah semifinal an thleng pha lo a, tun season-a Din-thar FC enkawl tur coach Lalchhuanawma Pautu chuan, "Kei chuan champion hi ka duh hrim hrim a, chak duhna thinlung neih loh chuan inkhelh chhan tur a awmin ka hre lo," tiin Vanglaini palai a hrilh.

An team dinhmun sawi zuiin LCh-a chuan, "Kan bud-get a lian lo a, amah-erawhchu kan sum neih dan thlir chuan ka beisei angin player kan la ṭha. Kan player ziah luhah hian rinna ka nghat a, min champion pui theiin ka hria. Kan senior player-te an thawkrim a, rawlthar player-te nen an inchawhpawlh ṭha bawk," tiin a lungawi thu a sawi.

Dinthar FC lakluh zingah Aizawl FC innghahna ni
ṭhin Michael Lalremruata a tel a, Khatla tlangval leh Dinthar chhuanvawr Samuel Laltlanthanga inkawp tur hian MPL5 an tihmuhnawm phah ngei ang. Rawlthar hmelhriat loh an la thar nual.