Wimbledon Inkhel ngaihven hlawhah Federer chak
Wimbledon 2016 second round chauh la ni mah se a inkhel turte an inthlauh em avangin Roger Federer leh British qualifier Marcus Willis te inhmachhawn tur khan ngaihven a hlawh - a tawpah a thiam zawk Federer a chak.
Nilaini zan khan Centre Court-ah world number 3 Federer hian darkar khat leh minute 24 chhungin world number 772 Willis chu 6-0, 6-3, 6-4 in a hneh a, third round a lut.
Wimbledon vawi sarih champion tawh Federer-a'n British tlangval Willis lakah zahngaihna a lantir lo, game hmasa pasarih la fai vekin minute 22 chhung ngawt chu Willis hian game point pawh a hmu lo!
Kum 25-a upa Willis hian Wimbledon khel tur hian qualifying-ah inkhel paruk ngawt a paltlang a, first round-ah beisei loh tak maiin world number 53 Ricardis Berankis a hneh a, tour level-ah a vawi khat chakna a ni nghe nghe.
Willis hian tun hmain tennis a khelh lawmman aṭangin pound 220 vel chauh a la dawng a, tun ṭuma second round a luh avang hian pound 50,000 a dawng dawn a - ATP Ranking chhuak tharah chuan number 416 vel-ah a kai chhoh beisei a ni bawk.
Grand Slam vawi 17 champion tawh Federer chuan, "Marcus khan thahrui a ngah a, beisei loh tak takin min rawn nawr fo. Ṭantu a neih ṭhat bawk avangin inkhelh a nuamin a hlimawm phian," tiin a sawi.
Dai ngai loh ram daitu Willis chuan, "Thawnthu mak tak ang mai a ni, hnehna chang thei turin ruahmanna ka siam a, mahse ka hlawhtling lo. Hlauthawng miah loa ka inkhel thei ka a makin a nuam hle," a ti.
World number 1
Champion lai Novak Djokovic-a'n tun dinhmuna player ṭha ber a nihzia a lantir leh ta. Darkar hnih leh minute li chhung lekin Adrian Mannarino lakah 6-4, 6-3, 7-6 in hnehna a chang.
World number 1 Djokovic hian Grand Slam bikah match 30 zet hneh loh a tawng tawh lo - tunah hian major tournament nomawi pali kawl khawm vekin tun ṭumah pawh hian champion tura rinkai a ni.
Kum 29-a upa Djokovic chuan, "Ka khelh dan tur ruahmanna ka siam lawk ṭhin a, vawiin khan ka beisei angin ka khel chhuak thei. Ṭha taka ka khel tluang thei hi ka lawm a, tihtakzetna nena ka khelh zel chuan eng nge lo thleng zel dawn tih ka hria ang," a ti.
Serbian thiampuipa hian kuminah Australian Open leh French Open nomawi a chawi tawh a, Wimbledon leh US Open a champion leh thei a nih chuan khum khat chhungin Grand Slam paliah a champion kim thei dawn a ni.
Second round inkhel dangah seeded 10-na Tomas Berdych chuan Ivan Dodig lakah fiahna hautak a hmachhawn. Czech Republic tangval Berdych hian darkar thum leh minute 24 chhungin 7-6, 5-7, 6-1, 7-6 in hnehna a chang hram.
World number 76 Dodig-a'n a service ṭhat hmang ṭangkaiin vawi 18 ngawt ace a siam a, mahse 2010 Wimbledon runner-up Berdych-a'n a service hi ṭum sarih ngawt a chhuhsak theih avangin a ṭang zo lo.
Thawhlehnia ruah surin a tih buai vanga inkhel zo thei lo Bernard Tomic leh Fernando Verdasco te pawhin Nilai zan khan second round an inhlangkai ve chiah bawk.
Ruah vanga buaina
Wimbledon khelhna hmunpui ber Centre Court chu a chung khuhna awm mah se court dang zawngin ruah sura khuh hulna tur a la neih loh avangin inkhel ṭhenkhat chu zawh hman a ni lo.
Seeded 13-na David Ferrer leh Nicolas Mahut leh inkhel bakah seeded 18-na John Isner leh Marcos Baghdatis te inkhel pawh tih tawp rih a ni - nizan khan khelh chhunzawm tura ruahman niin result erawh kan hre hman lo thung.