Ramhlun N-in player 28 an ziak lut

Nimin tlai khan tualchhung football transfer chu a tawp ta a, MPL club thar Ramhlun North chuan player 28 an ziak lut.

Ramhlun North honorary secretary K. Lalenghluna (Ma-enga) chuan, "Team balance kan ngai pawimawh a, player mala chhuan tur kan nei lo. Team game khelh kan tum a, kan coach Lalruatliana Sailo kaihhruainain inkhel hmuhnawm tak kan lantir theih ngei ka ring," tiin Vanglaini palai a hrilh.

MPL kaithar Ramhlun North hian Mizoram inelna sang bera tawnhriat nei tawh player an lalut nual a, Luangmual FC aṭanga an lakluh B. Malsawmzuala hian MPL-ah goal 12 a khung tawh a, a kawppui tur Siaha striker MC Malsawmzuala nen hian dah hniam theih an ni lo a, Chanmari FC aṭanga an lakluh Vanlalthlamuana an la kawl cheu bawk.

Ramhlun North hian Chan-mari West FC aṭangin keeper Liansangpuia, defender Ram-dinmawia leh midfielder Zosangliana an lalut bawk a, MPL an kai theih nana player neih sa nen team ṭha tak an nih ngei a rinawm.