Paris Olympic champion Novak Djokovic

Dawhthei takin a nghak a, beidawng duh loin a bei hram hram a, chau leh hah chung chung pawhin a hmangaih Serbia tan a bei ṭhin - a tawpah chuan Novak Djokovic-a'n tennis a thleng chhuak ta!

Pathianni zan khan Paris Olympic mipa tennis final khelh niin, mipui ngaihven bik inkhelah Djokovic hian vanglai hmang chho mek Carlos Alcaraz chu 7-6 (7-3), 7-6 (7-2) in a hneh a, lawm avangin a biangah mittui a luang.

Steffi Graf, Andre Agassi, Rafael Nadal leh Serena Williams te huangah Djokovic hi a lut ta chiah. Grand Slam pali - Australian Open, French Open, Wimbledon leh US Open bakah Olympic gold medal lain 'Golden Slam' thei pangana a ni ta.

Set hnih chauh khel mah se match rei zawng hi darkar thum deuh thaw a tling, player pahnih an inkhel tawkin point khat chauh hmuh belh pawh a harsa ṭhin, a tawpah forehand winner hmangin gold medal a vaw chhuak.

Hnehna a chan hnuah a team awmna lam a pan a, tennis court-ah racquet dahin lawm avangin awm dan a thiam lo a ni ber mai. A khingpui Alcaraz a kuah hnuah France rama tennis khelhna hmun hmingthang Court Philippe Chatrier-ah a ṭhingṭhi a, lawm avangin a hnuk a ulh a ni.

A nghak chhuak

Tennis inelna ngaihhlut ber chu Grand Slam a ni a, heng inelna lianah hian Novak Djokovic hi vawi 24 tehmeuh a champion tawh, mipa player zingah amah hnaih ber Rafael Nadal (22 titles) aiin vawi hnihin a champion tam zawk.

Grand Slam dawta inelna ngaihhlut hlawh ATP Masters 1000 huangah pawh vawi 40 teh meuh a champion tawh bawk a, season tawpa a thiam zual pariat inelna ATP Finals title a lak zat pawh pasarih a tling, a sulhnu hi a ropui tham hle.

Mahse, Paris Olympic 2024 neih hma kha chuan a tennis zinkawng kha a famkim thei bik lo, a chhan chu Nadal leh Andy Murray te anga Olympic gold medal a la vuak chhuak ve loh vang kha a ni pakhat, mi ten an sawi ṭhin ber pawh a ni.

Kum 2024 a lo her chhuak a, kum 37 mi Djokovic tan kum ṭha a ni lo. Australian Open, French Open leh Wimbledon an khelh zawh hnuah pawh a la champion lo vek, inelna tenau dangah pawh a champion chiang lo.

A kum a tam deuh tawh a, amah aia naupang zawk te pawhin Wimbledon leh Olympic a inhnaihchilh em avangin Paris khawpui pan loh phah an awm, hetih lai hian ram a hmangaih avanga mite fak hlawh Djokovic erawh a feh chhuak hram.

Serbia tana Olympic a hmachhawn hnuhnung ber a nih tawh a rinawm a, season a hman dan aṭanga teh chuan rinkai ber ni lo mah se a champion - Olympic vawi nga a khelhnaah a hlawhtling ve ta chiah tihna a ni.

A thleng chhuak

Olympic gold medal a la chiah a, zawhna a dawn hmasak leh langsar tak mai chu "Tennis i thleng chhuak taah i ngai em?" tih a ni a, chhanna dang a awm lo - a thlen chhuah tawh thuin a chhang a ni.

Djokovic chuan, "Tennis zinkawngah hlen chhuah leh tur dang ka nei tawh lo, tunah chuan Olympic gold medal ka la ta. A thlen tur ang chin chu ka thleng, mahse he infiamna hi ka hmangaih a, tournament dang khelh leh zel erawh ka la tum.

"Ka hma hunah eng nge thleng dawn tih chu ka la sawi thei lo, tun dinhmunah chuan hun rei tak chhung beiseina sang tak nena ka lo nghah tawh ka hlen chhuak a, medal ka lak hi lawm phawt mai ka duh," a ti.

Thla hmasa lawk kha chuan Roland Garros an khelhna hmun hi Djokovic hian khup hliam vangin a chhuahsan, a khup hliam hi zai niin a chawlh deuh vang vang hnuah Wimbledon a khel leh a, final lut mah se Alcaraz a hneh lo.

Spanish star Alcaraz hian kuminah French Open leh Wimbledon nomawi a chawi a, tun ṭumah pawh hian rinkai a ni. Mahse, player ropui bik Djokovic-a'n Olympic champion a tumna kawng erawh a dal zo ta bik lo a ni.

Paris Olympic singles match a khelh hoah Djokovic hian hnehna a chang vek a ni satliah lo, set a hloh miah lo a ni. Tun season atana a champion-na hmasa ber leh a duhthusam ti kimtu a nih avangin Paris Olympic hi a theihnghilh ngai tawh lo ang.