NE United Reserves tan Aizawl FC an ṭha hret

I Day Football-ah Aizawl FC-in nimin khan state pawn aṭanga chahluh NorthEast United Reserves chu 4-0 in an sawp. I League club tan Lalbiakdika'n goal hnih a khung a, Zomuansanga leh Lalchhawnkima ten goal khat ve ve an khung bawk.

Victor Lalbiakmawia hote hian match hnihah vawi hnih an chak a, goal an chhuah loh bakah goal 11 tehmeuh an khung. Aizawl FC hian FC Bethlehem leh Mizoram Police te an la hmachhawn dawn a, semifinal lut turin harsatna an neih a rinawm loh.

Aizawl FC-in NE United reserves an hmachhawn chungin player enchhin nan an hmang ngam a, tlarhma an thlak hlawk. Laltlanzova leh Sawma Tlangte ten mual sirah bul an ṭan a, Zomuana'n no. 9 hna a chelh. Mizo club hian first half-ah inkhel thunun a, chance ngah mah se goal an khung thei lo.

Second half-ah Champhai Zotlang tlangval BD-a a rawn inlan a, minute 47-naah goal a khung nghal a, injury time-ah chak nemnghehna goal a khung leh bawk. BD-a hian MPL11-ah goal nga a khung tawh a, I Day Football-ah pawh match hnih lek aṭangin goal li a khung a, Aizawl FC inghahna tak tak a ni tawh.

BD-a goal khung inkarah hian Zomuana leh captain Chhawnkima ten an khung. Zomuana hian box chhungah rilru fim a hmang a, minute 50-naah cool takin a push lut. Aizawl FC captain Chhawnkima erawhin corner kick aṭanga ball kal a tauh lut.

Nimin group B inkhel hnuhnung zawkah Bethlehemin Chawnpui 1-0 in an hneh a, goal awmchhun hi substitue Kiran Chettri-a'n a khung. Lalhriatpuia Sailo enkawl FCB tan hnehna hlu bik a ni a, MPL club an nih hnua chak hmel an hmuh hmasak ber a ni.