Gallagher-a'n Atletico pan a remti

Chelsea midfielder Conor Gallagher chuan Atletico Madrid zawm a pawi ti lo a, England international hian Spain lam hawiin a puanthuah a tel ta ngei dawn niin a lang.

Kum 24 mi Gallagher hi Atletico hian pound maktaduai 33-a lakluh tumin Chelsea an dawr a, Blues lam hian an dawrna hi lo pawm mah se, English midfielder hian England chhuahsana club zawm a duh ang em, tih chu zawhna awm a ni.

Mahse, Pathianni zan khan Gallagher hian a rilru siam felin, Atletico thuneitute club an club pan a duh thu a hrilh a, Spain-ah hian medical neiin, tlangzarh thuai a ni ang - he thuziak i chhiar meuh chuan an in la lut fel tawh hial mai thei.

England tana vawi 18 inlan tawh Gallagher hi player creative tak ni lo mah se, a thawhrimna leh team tana a inpekna chu fans tam takin an duh phah a, kum riat mi lek a nih laiin Chelsea hi a zawm - an chhungkua hi Chelsea fans an ni sa hrim hrim bawk.

Hengte avang hian Chelsea fan-ten an ngaina lehzual a, mahse, coach thar Enzo Maresca-a'n possession behchhana team din a tum avangin Gallagher tan hian hmun a awm loa ngaih a ni.

Kum 18 zet Stamford Bridge-a hun hmang tawh Gallagher hi Chelsea chuan June thla khan contract thar an zawrh ngei a, mahse, an contract hi Gallagher hian a pawm duh bik lo.

Chelsea-a season khat chiah nei tawh midfielder hi kum hnih atan contract thar hi zawrh a ni a, a khelh ṭhat dan a zira kum khat dang pawhsei theih tura tih a ni bawk. Mahse, Gallagher hi squad-a hmun pawimawh a chan tawh loh tur thu hrilh tel a ni a, an contract zawrh hi a rei loh bawk avangin English midfielder hian a pawm duh lo.

Hetiang boruak karah hian Gallagher duhtu English club an awm nual a, mahse, Chelsea hian Premier League-a an elpuite hnena hralh ai chuan ram pawn lama kaltir an thlang zawk - Atletico ngamna zat hi English club ṭhenkhatin an ngamna zat aiin a hniam zawk.

Gallagher hian Chelsea bak club nghet a la nei ngai lo a, hetihrual hian Charlton Athletic, Swansea City, West Bromwich Albion leh Crystal Palace-ah te loan-in a khel tawh thung a, a bik takin Palace-ah hian hming a chher hle.

Blues tan inelna hrang hrangah match 95 khela goal 10 khungin, assist vawi 10 a nei a, kum 2019 khan Europa League-ah champion puiin, hei lo hi nomawi langsar chawi a la nei lo.