Chanmari leh Ramhlun Athletic an intluktawk
GIG Motors I Day Football-ah champion rinkai Chanmari FC chu MPL kai thar Ramhlun Athletic-in an chelh a, 2-2 in an inhnehtawk. Group A inkhel dangah Sihphir Venghlun FC-in Bethlehem Vengthlang 6-0 in an sawp.
Vawiin hian group A team-te RG Stadium-ah an inkhel lehnghal dawn. Chawhma dar 12:00-ah Sihphir Venghlun leh SYS FC an inkhel ang a, tlai dar 3:30-ah Bethlehem Vengthlang leh Chanmari FC te an inkhel ang.
Team ṭha 2
I Day Football ṭan hmain group B chu 'group of death' hming lem pek a ni a, group A chu awlsam tur a ngaih a ni. Lalsangzuala Hmar hote hi awlsam taka semifinal lut tura ngaih an ni a, mahse an beisei ang ngawtin a awlsam lo.
Chanmari hian SYS leh Sihphir Venghlun te 2-1 ve vein an hneh a, goal chuang liam an khung lo. MPL11-a goal khat mah la chhuah lo, Chanmari hi I Day Football-ah an tla hniam a, goal la khung tho mah se an tlarhnung a pawp.
Ramhlun lakah Chanmariin Lalnunzama leh Lalrokima Sailo te hmangin ṭum hnih hma an hruai a, amaherawhchu James leh Isak Vanlalpeka te hmangin Danny-a hoten siphurh an sut zo. Chanmariin insiamṭhat an mamawh hle.
Tun dinmunah Ramhlun hi goal difference-ah an ṭhat zawk avangin pakhatnaah an awm a, a chung bera awm hi an phu ve bawk. Chutihrualin semifinal lut tur chuan Chanmari hmabak a awlsam tawh zawk. Coach Sanga hote hian vawiina Aizawl DFA First Division club BVT an hneh hrim hrim chuan semifinal an lut dawn.
Beiseina nung nei SVFC
Sihphir Venghlun FC-in a tikimtu nih mai an tum lo a, semifinal beiseina chhi nung turin BVT 6-0 in an hneh. SVFC tan hian man of the match-a thlan Lalremruata'n goal hnih a khung a, Vanlalruata Tlangte leh Ricky Lalramnghaka ten goal khat ve ve khungin BVT player K. Lallawmzuala leh Vanlalpeka Pautu ten an lamah an tilut.
Sihphir Venghlunin point thum hlu tak an hlawhchhuah avangin match hmasa berah Chanmari FC hneh lo mah se semifinal kawng zau tak a la inhawng. SVFC hian an khelh hmabaka SYS FC leh Ramhlun Athletic te an hneh ve ve chuan knockout stage an lut dawn a, an kutah engkim a la awm a ni.