Alvarez hi kan player a ni - Pep Guardiola

Manchester City boss Pep Guardiola chuan chhuak tur anga sawi Julian Alvarez chu an player a la nih reng thu a sawi a, Spanish manager chuan, "Chanchinthar a awm lo a, engmah sawi tur a awm lo. He club-ah hian a lo kir leh ang," a ti.

Alvarez hian Etihad Stadium-ah kum 2028 thleng cham turin contract a nei a, season hmasa khan inelna hrang hrangah match 54 khelin goal 19 a khung a, assist vawi 13 a nei bawk. Mahse, Alvarez hi match pawimawha chhalah a inlan phak meuh lo a, Erling Haaland a awm miau avangin a tan a harsa.

Hei vang hian Argentina international hian a hma hun a chian loh thu a lo sawi tawh a, "Season hman zawh takah khan team tana minute khel tam ber ka ni a, mahse, zep tur a awm lo - match pawimawha inthlan loh leh ṭhin chu hrehawm tak a ni," a lo ti tawh.

Atletico Madrid chuan Alvarez hi an duh nia sawi a ni a, City nen an indawr tawh. Mahse, Pep chuan, "City player a ni a, ka ruahmannaah a la tel reng. Mahse, thutlukna a la siam tur thu a sawi a, tunah chuan chawl hahdam phawt se, inpeih tawh nia a inhriat hunah a lo kir mai ang," a ti.

Pep chuan sawi zawmin, "A lo kir hunah chuan Copa America leh Olympics-a a hlawhtlinna avangin ka lo lawmpui ang a, lawm takin ka lo kuah ang. Chu chu thil tak tak chu a ni," a ti a, mimal chauh ni loin, team boruak ngaihtuah tur tam tak a neih thu a sawi bawk.

Alvarez hian Argentina tan World Cup nomawi chawi tawhin, Copa America-ah a champion pui leh a, world champion striker ni chunga club tana hmun pawimawh chan phak loh hi a tlawm thlak ang.