Reds-in Carvalho duhtu Saints hnar

Southampton chuan Fabio Carvalho lakluh tumin Liverpool dawr mah se, pound maktaduai 15-a Premier League kai thar dawrna chu Reds hian an lo hnar nghal.

Kum 21 mi forward hi Liverpool boss thar Arne Slot-a ruahmannaah a tel a, Dutch coach hian 4-2-3-1 formation-ah a chhawr ṭangkai theih a beisei. Heti chung hian man man taka dawrtu an awm chuan, Liverpool hian hralh an rem ti dawn nia sawi a ni.

Carvalho hi USA-a pre-season tour nei zo hlim Liverpool tan US-ah a che ṭha hle a, Arsenal leh Manchester United an hneh ṭumin goal a khung ve ve. Mahse, Reds hian Euro leh Copa America khelh vangin Luis Diaz, Darwin Nunez leh Cody Gakpo te chu US-ah hian an hruai lo a, season ṭan hunah Carvalho tan hmun chan a harsa mai thei.

Saints hian Carvalho hi rei tak an lo thlithlai tawh nia sawi a ni a, an ngamna zat erawh Liverpool tan a tlem hret. Season hman zawh takah khan Portuguese forward hian RB Leipzig-ah loan-in hun a hmang a, inelna hrang hrangah match 35 khela goal kua khungin, assist vawi hnih a nei.