Kar tawp hmang nuamtu Enea Bastianini

Enea Bastianini tan chawlhkar tawp nuam bik a ni - MotoGP British Grand Prix tlan zawh takah pakhatna a ni a, intlansiak pangngai neih hmaa tlan 'Sprint Race' pawh a kuta awm a ni bawk.

Pathianni zan tir lama tlan zawh takah Ducati rider Bastianini hi rider championship lama hmahruiatu Jorge Martin hmaah a thleng a, pathumna chu world champion vawi hnih ni tawh Francesco Bagnaia a ni thung.

Silverstone tlankawngah pahnihna aṭanga tlan ṭan Bagnaia hian lap hmasa berah, a hmasa ber aṭanga tlan chhuak Aleix Espargaro a tlan pel nghal a, beisei nei sang viau mah se pathumnaah a lungawi a ngai.

Martin pawh a tlan ṭha takzet a, mahse hun tawp dawn lamah tihsual a nei zauh - a chetsual zeuh karah Bastianini a chesual ve duh lo - Inrinni lama hun hlimawm a hman chu Pathianniah pawh a chhunzawm.

Hnehna changtu Bastianini chuan, "Intlansiak harsa tak chu a ni, a tir lamah tihsual ka neih avangin palina ka ni a, mahse ka hmaa rider pathum an tlan lai pawh khan ka chak thei ang tih ka ring tlat.

"Zawimuangin hma ka sawn hret hret a, Aleix leh Bagnaia ka hnaih tawh hnuah phei kha chuan inrintawkna ka nei sang a, lap hnuhnung panga vela Jorge nen kan inum pawh kha a nuamin a hautak khawp mai," a ti.

MotoGP champion vawi ruk ni tawh Marc Marquez chu pasarihna aṭanga tlan chhuak chungin palinaah a tawp thei a, atan intlansiak ṭha pangngai tak ni mah se champion beiseina erawh a tlem ta hle.

Gresini Ducati rider Marquez chuan, "Kei leh kan team tan chuan kartawp harsa tak a ni. Practice lai aṭangin kan che fuh tawk lo a, tihsual kan ngah hle bawk, ngaihṭha leh thlamuang taka kan tlan thei lo kha a pawi," a ti.

Rider championship lamah Martin a la chungnung chhunzawm a, a hmahruaina erawh point thum chauh a nih avangin intlansiak vawi khat lekah an dinhmun a inthlak kual daih thei reng.

Ducati rider Martin chuan, "Enea Bastianini kha a tlan ṭha em em mai a, a tir aṭanga a tawp thlengin a tlan mar pat reng, chuvangin hnehna changtu nih hi a phu pawh ka ti hle.

"Pahnihna nih pawh hi ka tan thil ṭha a ni, tunah chuan championship hmahruaitu ni chungin Austria kan pan thei dawn a, a phurawm dawn takzet a ni," a ti a, a hmahruiana erawh a him bik lo tih a pawm.

Khawvela bike intlansiakna sang ber hi tun thla chhungin vawi khat an tlan leh dawn. August 18, Pathianni tlai dar 5:30 hian Red Bull Ring tlankawngah Austrian Grand Prix an tlan leh dawn a ni.