West Ham-in forward thar an nei

Premier League club West Ham chuan Dutch forward Crysencio Summerville chu Leeds United aṭangin an la lut a, Championship club striker tan hian pound maktaduai 25 an insen bakah, a khelh ṭhat dan a zira pek belh tur a awm.

Kum 22 mi forward hian London Stadium-ah kum nga chhung khel turin contract a ziak a, Summerville chuan, "Ka kal zelna tur atana pawimawh tak a ni. He hmunah hian thawnthu ngaihnawm zawk ziah belh tura lo kal ka ni a, Europe-a West Ham hruai kir leh ka duh a ni," a ti.

Summerville hian kum 2020 khan Feyenoord aṭangin Leeds hi £1.3mtd-in a pan a, inelna hrang hrangah match 89 khela goal 25 khungin, assist vawi 12 a nei.

Season hman zawh taka Championship Player of the Year atana thlan Summerville chuan, "Coach nen inbiakna kan nei a, he club tana tha thawh ve thei turin min hmin a ni - he club hi hma ka sawn zelna kawnga pawimawh tak a nih ka beisei," a ti.

Julen Lopetegui enkawlna hnuaiah Hammers-in inthuam ṭhat an tum hle. Summerville hma hian Wolverhampton Wanderers captain Max Kilman (£40mtd), goalkeeper Wes Foderingham (free) leh Palmeiras aṭangin Brazilian winger Luis Guilherme (£25.5mtd) te an an la tawh a, Manchester United full back Aaron Wan-Bissaka pawh an rim mek. Hammers hian Germany international striker Niclas Füllkrug an lalut dawn bawk.