City defender-in Dortmund zawm

Manchester City right back Yan Couto chuan Borussia Dortmund a zawm a, an inrem danah chuan season thar lo awm tur hi loan-in a khel phawt ang a, a match khelh tam dan a zirin German club hian euro maktaduai 30-in an lei zui thei ang.

Kum 22 mi defender hi City player ni mah se, Pep Guardiola enkawlna hnuaiah hmun a chan phak loh avangin City tan a inlan miah lo - hetih chhung hian Girona leh Braga-ah te loan-in a khel a, tun hnai season hnih chu City Football Group hnuaia mi Girona-ah a khel.

Brazilian defender hian season hman zawh takah khan inelna hrang hrangah match 39 khelin goal hnih a khung a, assist vawi 10 a nei bawk - Girona hi Champions League khel turin a hruai kai a, Dortmund tan player ṭangkai a ni thei ang.

Couto chuan, "Ka tan chuan mumang thleng dik ang mai a ni. Borussia Dortmund hi club danglam tak a ni a, Brazil-a naupangte chuan he club ropuizia hi an hre vek a ni.

"Dortmund jersey a vawi khat nana hak a, he stadium ropui tak boruak tem hlan hi ka nghakhlel tawh hle a ni," a ti a, Brazil tana vawi li inlan tawh defender hian German club zawm chu duhthusam thleng dik a nih thu a sawi.

Season hmasaa Champions League final khel Dortmund hian coach thar Nuri Şahin enkawlna hnuaiah season an hmachhawn dawn a, nipui transfer-ah an mit an len nasa hle.

Couto hma hian season hmasa Bundesliga-a match 28-a goal 28 khungtu Serhou Guirassy chu VfB Stuttgart aṭangin €18mtd-in an la lut a, Stuttgart player tho, centre back Waldemar Anton chu €22.5mtd-in an la lut a, Brighton & Hove Albion aṭangin Pascal Groß chu €7mtd-in an la tawh bawk.