Celtic an chak nuamsa

Scottish Premiership chu khelh ṭan a ni leh ta a, champion lai Celtic chuan an match hmasa berah Kilmarnock chu 4-0 ngawtin an sawp nghal - Brendan Rodgers-a enkawl team tan hian Reo Hatate, Liam Scales, Nicolas Gerrit Kühn leh Anthony Ralston ten goal khat ṭheuh an khung a, Kilmarnock-in a chhanletna tur an nei lo.

Celtic hian US lamah pre-season tour hmangin an che chhe lo hle. Major League Soccer club DC United chu 4-0 ngawta an sawp hnuah, Premier League club ṭha Manchester City (4-3) leh Chelsea (4-1) te an hneh leh a, an league match hmasa berah chiang takin an chak zui - Rodgers-a nauten nomawi humhim an tum tih khelmualah an lantir.

Hetihlai hian Scottish football-a Celtic elpui ber Rangers bul ṭan dan erawhin duhthu a sam lo hle. Philippe Clement enkawl team hian Inrinni zan khan match hmasa ber khelin, Heart of Midlothian chu 0-0 in an inhnehtawkpui a ni.