Damlo chunga Paris pantu Tamberi

Olympic mipa long jump champion lai Gianmarco Tamberi chu, harsatna nei chungin Paris Olympic 2024 hmachhawn turin a feh chhuak - Italy tan gold medal lak leh ngei a tum a ni.

Pathianni khan Tamberi hian damdawi ina a awm lai thlalak chu social media lamah a dah chhuak, a kal (kidney) enkawl a ngai, a khua a sikin harsatna a nei tel bawk.

Nilaini hian qualifying competition an nei dawn, final chu Pathianniah neih tur a ni thung ang - gold medal a kawl lai humhim chu atan thil awlsam a ni dawn lo tih a chiang.

Tokyo Olympic an neih ṭum khan Tamberi leh Qatar mi Mutaz Barshim te chu tehna hrang hrangah an intluk zel a, an pahniha biak an nih hnuah gold medal an dawng ve ve a ni.

Kum 32 mi Gianmarco Tamberi chuan, "Chawpchilh takin CT scan tih a ni a, ultrasound, thisen test leh thil dang pawh tih a ni. Inelna neih hma lawkin damdawi inah ka mut a ngai ta tlat.

"Mahse, Italy tan theihtawp ka chhuah dawn, ka kawsik a reh loh avangin ka taksa pawh a na. Amaherawhchu, inelna hmachhawn theia ka awm a nih phawt chuan ṭhulh ka tum lo," a ti.

Tamberi hian Paris a pan hun tur pawh khan ti tlai turin thurawn a lo dawng tawh tih a sawi a, mahse a tira ruahman lawk angin a kaltlang pui ta tho - damlo chunga inelna hmachhawn tur a nih avangin ngaihven a hlawh zual ang.